Ikala Mwimvwaniki Mulumbuluke
1 Kwimvwana na katentekeji i kintu kilomba kwikala mwidingile. Kadi kulombanga ne mwimvwaniki nandi ekale na mutyima wa kufunda ne kuboila ñeni mu byaivwana. O mwanda Yesu wānene ukoma amba: “Tai mutyima ku muswelo omumvwana.”—Luka 8:18, NW.
2 Tufwaninwe kwimvwanija nakampata kyaba kyotutanwa ku kupwila kwa pa kipwilo, ku kubungakana, ne ku bitango. Bino byo bitatyi byotufwaninwe kuteja’mo na katentekeji kabinebine. (Bah. 2:1) Ivwana myanda imoimo ikakukwasha wikale mwimvwaniki mulumbuluke ku kupwila kwa bwine Kidishitu.
◼ Kwata kupwila na bulēme. ‘Tufundijibwanga’ na Yehova mu miswelo mivule kupityila kudi “kalama wa bine.”—Is. 54:13; Luka 12:42.
◼ Witeakanye kumeso kwa kitatyi. Pituluka mu myanda ikapityijibwa, kadi tala shi wi mupaye Bible obe ne dibuku dine dyomwifunda.
◼ Shi kodi mu kupwila, longa bukomo bwa kujadika milangwe yobe pa byobanena. Kwisamba na boba bashikete kubwipi nobe ne kubandila bilonga bantu bakwabo mu kupwila ke biyampepo. Longa buninge bwa kuleka kupuakanya milangwe yobe na kulanga byokalonga shi mubapu kupwila nansha kulanga myanda mikwabo ikutala.
◼ Bandaula myanda yobanena. Wiipangule amba: ‘Lelo ino myanda intalanga paka? Le i kyaba’ka kyonkengidija’yo?’
◼ Andika mu kīpi myanda mikatampe ne bisonekwa bimanine’po myanda. Kino kikakupa muswelo wa kujadika milangwe yobe pa byobanena ne kukuvuluja myanda mikatampe yokengidija.
3 Fundija Bobe Bana Bayuke Kwimvwana: Bana basakilwanga bufundiji bwa ku mushipiditu. (Kup. 31:12) Pa kala, “bonsololo [bādi] bakōkeja kwivwana” umbukata mwa bantu ba Leza bādi banenwe kuta mutyima kyaba kyādi kibatangilwa Mukanda wa Bijila. (Neh. 8:1-3) Shi bambutwile balonda mu kupwila ne kuta mutyima mpata ku binenwa’ko, babo bana nabo kebakabulwepo kulongela monka. Ke biyampepo kupaila bana bya kukaya nabyo nansha tuye twa kushinga’mo misombelo amba ko kwibapwa mukose. Kadi kutambatamba kwenda ku musalani nako kukebakalakanya mu kwivwana. “Bulembakane i bukutwe umutyima wa mwana,” o mwanda bambutwile bafwaninwe kulonga bukomo bwabo bonso mwanda wa babo bana bekale nyeke bashikate pamo, mwa kulondela kupwila.—Nk. 22:15.
4 Kwikala bemvwaniki balumbuluke i kintu kituyukanya amba twi bantu ba tunangu, basaka ‘kutambula bufundiji buvule.’—Nk. 1:5.