Ikala Mulongi Udi na Nsangaji
1 Yesu wānene amba mu kitatyi kya kwikala’po kwandi, bantu bavule bakekala belwe’ko, “ne kuta’ko mityima mpika,” monka mwādi mwikadile ba mu myaka ya Noa. (Mat. 24:37-39, MB) O mwanda tuyukile amba bavule kebakevwanapo myanda miyampe ya Bulopwe. I bika bibwanya kwitukwasha tulame nsangaji yetu potwingila mwingilo wetu?—Mit. 100:2.
2 Kibajinji, tufwaninwe kuyuka amba musapu wetu ne mwingilo mwine wa kusapula i Leza witupele’byo. Shi bantu bapela kwitaba ku busapudi, nansha byotulonga bukomo bwa kwibasapwila, kunena na bubine, i Yehova obapela. Kuvuluka amba aye uloelelwe pa kwitumona twingila mwingilo wa busapudi na kikōkeji kuketulamina nsangaji yetu ne kwitupa ndoe ya mutyima bu balongi ba kinenwa kya Leza.—Yak. 1:25.
3 Kya bubidi, bantu ba kwitabija dishinda ya Yehova dya lupandilo bakidi’ko. Nansha bavule byobadi bañumauma, ino kukidi bantu badingakene na mikōko ba kukongakanibwa, nansha ke pano poketudi batakamane mu kitatyi kya ku mfulo. Nanshi tufwaninwe kusapula nyeke ‘mu bibundi byonso, bikatampe ne bityetye’ mwanda wa ‘kukimba’mo mwine udi mu ngikadilo mifwaninwe.’—Mat. 10:11-13.
4 Ikala Nyeke na Kikulupiji: Nsekununi ya bintu bya kiboja bilonga bipwilo bya bubela ityumunanga bantu bamo mu bidyoma. Bakwabo nabo ‘basusulwa ne kupalankanibwa’ na ino ngikadilo ya bintu. (Mat. 9:36) Bavule i batyintyidilwe na myanda ya bulofwa, kubulwa bukomo bwa ngitu, nansha kubulwa mutyima-ntenke. Kuyuka ino ngikadilo yobekele’mo kuketukwasha tūminine mu mwingilo wetu. Longa bukomo bwa kushilula mīsambo imanine pa myanda ikambakanya bantu mu wenu mwaba. Wibakwashe bayuke amba Bulopwe bwa Leza ye shalupwa wa myanda yonso. Ingidija Bisonekwa ne myanda mipotoloke ya mu mabuku mwanda wa kutenga mityima yabo na myanda miyampe.—Bah. 4:12.
5 Balongi ba nsangaji ba kinenwa kya Leza bavulukanga nyeke amba: “Tusepo twa Yehova i bukomo bwe[t]u.” (Neh. 8:10) Ketufwaninwepo nansha dimo kujimija nsangaji yetu. “Shi njibo umbeīmone mifwaninwe ndoe, nankyo ndoe yenu ifikile monka; nanshi shi keīfwaninwe nabya ndoe yenu yalukile konka ko mudi.” (Mat. 10:13) Yehova witupanga monka nsangaji ne bukomo bwetu kitatyi kyotūminina na kitūkijetyima mu mwingilo wandi ukola, kadi witweselanga pangala pa kikōkeji kyetu.