“Ingidilai Yehova ne Nsangaji”
1. I kika kibwanya kwikala nsulo ya nsangaji ku bengidi ba Yehova?
1 “Sangalai nyeke mudi Mfumwetu,” ye mwālembele mutumibwa Polo. “Mpituluka monka amba: sangalai!” (Fid. 4:4 BB) Madyese a kusapula myanda miyampe ne kukwasha bantu badi mu kifwa kya mikōko nabo batōte Yehova i nsulo ya nsangaji mikatampe. (Luka 10:17; Bil. 15:3; 1 Tes. 2:19) Le penepo shi tubamone’mba bitatyi bimo tubabulwe nsangaji mu mwingilo wetu napo? I kika kyotubwanya kulonga?
2. Kulama kotulamine mu ñeni nsulo ya mwingilo otupelwe kubwejanga nsangaji muswelo’ka?
2 Mwingilo Witupele Leza: Vuluka’mba mwingilo wetu wa busapudi utambile kudi Yehova. Bine, i dyese ne dyese’po kotudi pa kwikala “bakwingila mīngilo pamo na Leza” mu kusapula musapu wa Bulopwe ne mu kulonga bana ba bwanga! (1 Kod. 3:9) Kidishitu Yesu udi pamo netu mu uno mwingilo keukapitulukwa’mopo dikwabo. (Mat. 28:18-20) Bamwikeulu nabo batalwa na uno mwingilo kadi bengilanga pamo netu mu uno mwangulo mukatampe wa ku mushipiditu wangulwa. (Mat. 13:39; Bil. 8:26, 29; 16:14; Kus. 14:6) Bisonekwa, pamo ne myanda īmwena bantu ba Leza abo bene, bileta bukamoni bwa binebine bwa amba Leza ukwatakanyanga uno mwingilo. Nanshi kitatyi kyotusapula, twendanga pamo “bwa batwe batumwe na Leza, [pamo na] Kidishitu, ne Leza mwine umwene.” (2 Kod. 2:17, MB) Bine, ino yo nsangaji’po kashā!
3. I bukwashi’ka budi na milombelo mu kulama nsangaji mu mwingilo wetu?
3 Milombelo nayo idi na mvubu pa kulama nsangaji mu mwingilo wa Leza. (Ngat. 5:22, NW) Pa kusaka’mba twingile mwingilo wa Leza na bukomo bwandi, tufwaninwe kumulomba mushipiditu wandi, wapāna kyaba bulale ku boba bamulomba’o. (Luka 11:13; 2 Kod. 4:1, 7; Ef. 6:18-20) Kulombela pa mwanda wa mwingilo wetu kuketukwasha tulame mumweno muyampe kitatyi kyotulondololwa’mo bibi. Kadi kulombela kuketukwasha twendelele kusapula na bupyasakane, kwampikwa kakama.—Bil. 4:29-31; 5:40-42; 13:50-52.
4. I muswelo’ka ubwejanga kwiteakanya nsangaji yetu mu busapudi, ne i miswelo’ka imoimo mifike’po ya mwa kwiteakenya?
4 Witeakanye Senene: Dishinda difwaninwe dibweja’ko nsangaji yetu kitatyi kyotwenda mu mwingilo i kwiteakanya senene. (1 Pet. 3:15) Kuno kwiteakanya kekulombepo kitatyi kilampe. Minite’tu mityetye ya kupituluka mu bya kumwena’ko bya mwa kupānina mapepala a panopano nansha mu musapwilo mufwaninwe wa dibuku dyosaka kupāna i mibwane. Tala ntwelelo mifwaninwe mu kabuku Kushilula ne Kwendeleja Misambo nansha mu manimelo ashele kunyuma a Mwingilo Wetu wa Bulopwe. Basapudi bamobamo ba Bulopwe i bamone’mba kwandika musapwilo kampanda mu kīpi pa kapapye kudi na bukwashi. Kitatyi ne kitatyi belanga diso pa kapapye’ka mwa kuvulukila. Kino kibakwashanga baleke kutuyuka, kadi kibapanga kikulupiji kya kusapula kwampikwa moyo.
5. Nsangaji itupanga batwe ne bakwetu byabuyabuya muswelo’ka?
5 Nsangaji iletanga byabuyabuya bivule. Mwikadila wa nsangaji utobajanga musapu wetu. Nsangaji itupanga buninge bwa kūminina. (Neh. 8:10; Bah. 12:2) Kadi kya bulēme kupita, mwingilo wetu wa nsangaji utumbijanga Yehova. Nanshi, ‘twingidilei Yehova na nsangaji.’—Mit. 100:2.