Lundila’ko Nsangaji Yobe mu Busapudi
1 Nsangaji ya kusapula myanda miyampe—lelo wikalanga nayo mu mwingilo obe? Shi ketutadijepo, ino ntanda imbi yotudi’mo iketupa moyo wa kusapula, ne kwitujimijija nsangaji yetu. Kwingila mu mwaba wa bantu bañumauma nako kukokeja kwituzozeja. Penepo i matabula’ka mayampe otufwaninwe kutabula mwa kulundila’ko nsangaji mu busapudi?
2 Ikala na Mumweno Muyampe: Kwikala nyeke na mumweno muyampe kukwashanga byabinebine. Muswelo umo wa kwikala na mumweno muyampe i kulanguluka pa madyese makatampe otudi nao a kwikala “bakwingila mīngilo pamo na Leza.” (1 Kod. 3:9) Ne Yesu nandi udi netu potuvuija uno mwingilo. (Mat. 28:20) Witukwatakanyanga na kwitutumina kibumbo kya bamwikeulu. (Mat. 13:41, 49) Bine, tufwaninwe kukulupila amba bukomo botulonga buludikwanga na Leza. (Kus. 14:6, 7) Nanshi shi bantu kampanda betabija nansha bapela mwingilo wetu, tuyukei amba momwa mūlu mudi nsangaji mikatampe!
3 Witeakanye Biyampe: Kwiteakanya biyampe nako kwitulundilanga’ko nsangaji. Kwilongolola mwa kutambila mu mwingilo kekulombepo mingilo mivulevule, mhm. Kulomba minite mityetye’tu pa kubandaula mulangwe kampanda wa kwisambila’po mu mapepala a panopano nansha mu mabuku a kupāna mu mwine kweji’wa. Tonga musapwilo umo pa kamutwe ka mwanda “Mwa Kwisambila pa Kupāna Mapepala,” mu Mwingilo Wetu wa Bulopwe. Tala pa dyani dya ntentekelo dya Kweji 1, 2002, pa mutwe wa mwanda “Misapwilo ya Kulonda mu Mwingilo wa Budimi.” Nansha tala mu dibuku Comment raisonner utonge’mo ntwelelo mifwaninwe. Shi kudi kijika kampanda kikukambakanyanga nakyo bantu bavule, nankyo teakanya kilondololwa ne kūkupwila milangwe ku mwanda obasangela. Dibuku Comment raisonner didi na bukwashi bwabinebine pa uno mwanda. Kwingidija ano mabuku kuketupa kikulupiji kyotufwaninwe kwikala nakyo mwa kusapwila na nsangaji.
4 Lomba na Kininga: Milombelo idi na mvubu pa kulama nsangaji ya endaenda. Mwingilo otwingila i wa Yehova, o mwanda tufwaninwe kumudidila etupe wandi mushipiditu, mwanda kipa kyao kimo i nsangaji. (Ngat. 5:22) Bine Yehova uketupa bukomo bwa kwendelela na kusapula. (Fid. 4:13) Kulombela pangala pa mwingilo wetu kuketukwasha twendelele na kumona bintu mobikadile nansha shi tufikilwa na bintu bitufityija mutyima. (Bil. 13:52; 1 Pet. 4:13, 14) Shi tubaivwana moyo, milombelo ikokeja kwitukwasha twikale kūminina na kininga ne nsangaji.—Bil. 4:31.
5 Shitula Mikenga: Bine, twikalanga na nsangaji mikatampe mu mwingilo wetu shi tubatana bantu ne kwisamba nabo myanda miyampe. Kushinta bityetye mpangiko yobe mwa kutambila mu busapudi bwa ku njibo ne njibo mu bitatyi bishileshile, pakwabo shi dyuba dibapūluka bityetye nansha ku kyolwa bininge, kukokeja kulupula bipa biyampe. Kadi witananga na bantu ponso poendanga mu dishinda, mu nsoko, mu motoka nansha powinangijanga. Wabulwa’po kuteakanya’ko binenwa bīpi bya kushilula nabyo mīsambo ne kwikala na mutyima wa kufwena boba bamweka amba badi biyampe? Padi wingilanga kaji nansha kufunda ku masomo kampanda kowisambanga na bantu difuku ne difuku. Padi ukokeja kwikala na dyese dya kwibasapwila shi ukolomone’tu mwanda kampanda wa mu Bisonekwa ulangula kusepelela. Madingi mayampe kulonda atanwa pa paje umbajinji wa dyani dya ntentekelo dya Mwingilo Wetu wa Bulopwe wa Kweji 1, 2002. Kulonga bino byonso kukokeja kulundila’ko nsangaji mu busapudi.
6 Nsangaji yo itupanga muswelo wa kūminina, nanshi i kipite buya kulama’yo! Shi tulonge namino, tukapalwa mpalo ya ntanda ne miseke pakafula uno mwingilo keukapitulukwa’mopo dikwabo. Kino kyepelo kikokeja kwitulundila’ko kala nsangaji mu busapudi.—Mat. 25:21.