Mpangiko ya Kubungakana kwa pa Bula kwa Difuku Dimo
Mutwe wa mwanda wa mpangiko ya kubungakana kwa pa bula kwa difuku dimo ya uno mwaka mupya wa mingilo udi na kyalwilo kikomo mu Bisonekwa, unena’mba: “Kōkelai Leza—Mumukomene Dyabola.” (Yak. 4:7) Buno bo bwendeji bulumbuluke mu bino bitatyi bikomo! Kukōkela kotukōkele ku mbila ya Leza kwitufikijanga ku kulwa na Satana bulwi bwa kimwesha. Mpangiko iketufundija mwa kushadila bemanije ku nkuku ikuta Satana ya kusaka kutyumuna lwitabijo lwetu. Lelo i byabupeta’ka bimobimo bya ku mushipiditu byotukamwena mu kuno kubungakana?
Mutadi wa kipindi uketuyukija “Kulombola Kikōkeji kya Bwine Leza mu Kisaka” mokukankamikilanga bisaka binekenye mitabakano ya ino ntanda. Kishinte kibajinji kya muneni umpempudi, kinena amba “Kukomena Dyabola Kushintulula Bika,” kikashintulula mwanda waka ne muswelo’ka otufwaninwe kwiningisha mwa kulwila na nkuku ya Satana ya kusaka konakanya būmi bwetu bwa ku mushipiditu. Kudi bipindi bibidi biteakanibwe nakampata mwanda wa bankasampe, ke-pantu nabo bafwaninwe kudyumuka nkuku ya Dyabola. Bene Kidishitu bavule baikala ke batame dyalelo, pobādi bakidi bankasampe, bādi bapela kulonda bilokoloko bya ino ntanda. Tukasangala pa kwivwana betusekunwina myanda imoimo yobāikele kwimwena.
Kukōkela balupusa i kintu kilombelwe ku bantu bonso. O mwanda kishinte kya mfulo kya muneni umpempudi kikalombola patōka miswelo iná yotufwaninwe kulombola’mo kikōkeji kya bwine Leza: (1) ku imbikalo, (2) mu kipwilo, (3) ku kaji, ne (4) mu kisaka. Bine ino i mpangiko ya kamweno umbūmi kashā!
Boba basaka kubatyijibwa ku kuno kubungakana kwa pa bula kwa difuku dimo bafwaninwe kulombola mutadi mwimaniji kumeso kwa kitatyi. Batwe bonso tufwaninwe kutūla kayukeno pa dino difuku pa tulandadiye twetu ne kukatanwa ku mpangiko yonso mituntulu. Madyese otukeselwa’ko akekala a nyeke ne nyekeke shi tukōkela Yehova nyeke ne nyeke.