Tūla Kwipwija Mukose pa Kyaba Kyako
1 Mu ano mafuku mabimabi, batwe bonso tukimbanga kushinta byotulonga kyaba ne kyaba. O mwanda i kyendele’mo kwipwija mukose mu muswelo kampanda. Inoko kupityija kitatyi kivule mu kwipwija mukose, mu mazua, ne mu kushikata na balunda kukokeja bityebitye kujimijija muntu kitatyi kya kulondalonda bintu bya ku mushipiditu. O mwanda tufwaninwe kutūla kwipwija mukose pa kyaba kyako. (Mat. 5:3) Le tubwanya kwikutūla’po namani? I na kulonda madingi adi mu Efisesa 5:15-17.
2 Witūdile’ko Mikalo: Polo wāsonekele amba bene Kidishitu bafwaninwe ‘kutadija mpata’ muswelo obaludika būmi bwabo na tunangu. Bafwaninwe kwikala na butūkanye ne kwīfula mwa kutūdila kwipwija mukose pa kyaba kyokudi binebine na mvubu. I biyampe tulanguluke na kusumininwa pa muswelo otwingidija kitatyi kyakubulwa mingilo. Mazua afwaninwe kwikala na kitungo kya kamweno, shi bitupu tukafula ku kwialakanya amba abetujimijija kitatyi bitupu, nansha kwitushiya bapungile. Shi twadi tubepāna mu bintu kampanda, ino ku mfulo ketwialakanya amba kekudipo ne kyotwalonga kine, ketumwenene’mopo, ne kwitopeka mu muswelo kabidye, kano i kayukeno kalombola amba tufwaninwe kwilemununa mu mwingidijo wetu wa kitatyi.
3 Ikala na Bujalale: Polo wāletele madingi atala pa ‘kukūla kitatyi kifwaninwe’ kya kulonga bintu bya mvubu umbūmi, ne kuleka kwikala ‘bakubulwa bujalale.’ Bene Kidishitu bepāne kebakokejapo kupāna būmi bwabo mu kwipwija mukose. Eyo, kwitūja ne kwiolola kuntu kampanda byalujanga shabyo bukomo mu ngitu, inoko nsulo ya bukomo bwa ku mushipiditu i bukomo bwa Leza bwingila. (Is. 40:29-31) Tutambulanga mushipiditu wandi kupityila ku mingilo ya kiteokratike—mu kwifunda Bible, kutanwa ku kupwila kwa pa kipwilo, kwipāna mu mwingilo wa budimi—ke mu mazuapo, mhm.
4 Yuka bya Kutangidija Kumeso: Polo wāsoñenye bene Kidishitu ‘bendelele kuyuka monka mwikadile kiswa-mutyima kya Yehova.’ Yesu nandi wāfundija amba mingilo yetu ifwaninwe kwimanina dibajinji pa Bulopwe bwa Leza, twikale kwibutangidija kumeso mu būmi bwetu. (Mat. 6:33) Nanshi tunenwe kulonga bidi bintu bitupa muswelo wa kwikala na būmi bukwatañene na kwipāna kotwipēne kudi Yehova. Kupwa, ke kutūla kwipwija mukose pa kyaba kyako. Shi twikutūle pa kyaba kyako, kuketuletela bipa biyampe, kadi tukaloelelwa’ko mpata.—Mus. 5:12.