Ingidija Kitatyi Kyobe na Tunangu
1 Byotusaka kusangaja Yehova twikalanga na būmi bwimanine enka pa mingilo yetu ya ku mushipiditu. Kinenwa kyandi kitusoñanya amba ‘tubadikile bidi kusaka Bulopwe’ ne kuyuka “kutonga kyokya kitabukile kunengela.” (Mat. 6:33; Fid. 1:10, MB) Le tukakūla namani kitatyi kya kulonga tumweno twa Bulopwe ne kushiya mingilo mikwabo pa kifuko kyayo?—Ef. 5:15-17.
2 Badikija Mingilo ya Bulopwe Kumeso: Tandika kitatyi kyobe kutyina amba kyakapityila ku mingilo yampikwa kamweno. Bamo bashilulanga kweji ne kweji na kutandika kitatyi kya kutambila mu mwingilo wa budimi mu kalandadiye kabo. Kupwa kebatadija kutyina myanda mikwabo yakatādila mpangiko ino yobatandika. Mo monka motukokeja kulongela ne pa kukūla kitatyi kya kupwila, kwifunda pa kasuku, ne bitango. Bavule bene badi na mpangiko ya kushilula nansha kufudija difuku ne difuku na kutanga Bible. Witūdile’ko kitatyi kipotoloke kya kulonga mwingilo ne mwingilo wa kamweno, kadi kokaleka bintu byampikwa mvubu bikukalakanye.—Mus. 3:1; 1 Kod. 14:40.
3 Wikoke mu Kumwena mu bya Ntanda: Mu matanda amo, makayo, kwipwija mukose, kwiolola, mazua, ne bikwabokwabo i bivule bine. Bavule bajimijanga nsaa mingi mu kutala televijo nansha mu kwingidija kompyuta. Na bubine, kukuja mutwe mu mingilo ya kwipwija mukose ne mu bituntwa bipya bileta ino ntanda kutwala enka ku kutyumukwa mutyima. (1 Yoa. 2:15-17) Pa kino, Bisonekwa bitudyumuna amba ketwakimwena bya kumwena kutabuka mu ino ntanda. (1 Kod. 7:31) Shi tuteja ano madingi a tunangu, nabya tukalombola Yehova amba mutōtelo wandi udi pa kifuko kibajinji mu būmi bwetu.—Mat. 6:19-21.
4 Kyaba kyashadila’ko ino ngikadilo ya bintu kibatyepa. Boba batangidija tumweno twa Bulopwe kumeso bakekala ba nsangaji mwanda baketabijibwa na Leza. (Nk. 8:32-35; Yak. 1:25) Shi ke pano, twingidijei na tunangu kitatyi, kituntwa kyetu kya mvubu.