Muswelo Wa Kukūla Kitatyi Kilumbuluke
1 Ketudipo na kyaba mwanda tudi na bintu bivule bya kulonga mu mwingilo wa Yehova. (1 Kod. 15:58) Tuyukile mvubu ya kwifunda kwa pa kasuku ne kwa mu kisaka, ya kutanga Bible difuku ne difuku, kwiteakanya ku kupwila ne kutanwa’ko, kadi ne ya kwipāna kitatyi ne kitatyi mu busapudi. Batadi bavuijanga kiselwa kya bukumbi ne kwingila mingilo mikwabo itala kipwilo. Bamo-bamo badi na biselwa bīlema bya bisaka nansha mingilo ya miswelo mikwabo. Omwanda kifwaninwe umo ne umo umbukata mwetu ekale na ndiñamano ne mwilongolole mwa kubwaninya kulonga byonso.
2 Tutangidijei Kumeso Bintu bya Mvubu Mikatampe: Tufwaninwe kwikala na kusansanya ne na milangwe milumbuluke shi tusaka kubwanya ‘kukūla kitatyi kilumbuluke ku mutamba wetu.’ (Ef. 5:15, 16) Tufwaninwe kuyuka ‘bintu bidi na kamweno kutabuka’ ne kwibitūla pa kifuko kibajinji mu mulongo wa bintu bya mvubu mikatampe kotudi. (Fid. 1:10) Ba mulume ne mukaji basekununa kisaka kyabo kya kiteokratike mokikadile’mba: “Twi badinge būmi bwetu’nka na bubinebine. . . . Bubinebine ke mumwekelopo bitupu wa būmi bwetu, mhm, ino ye būmi bwetu bwine. Byonso bishele bimanine ponka pa abo.” I kyakamweno kotudi kutūla mutōtelo wa Yehova ne mwingilo Wandi pa kifuko kibajinji umbūmi bwetu.
3 Tujingululei Bintu Bitujimijijanga Kitatyi: Tufwaninwe kwingidija kitatyi kyotudi nakyo na tunangu, mwanda yenga umo udi na nsāa 168. Shi tusaka kwikala na kitatyi kibwane kya kwingila mingilo ya kiteokratike, tufwaninwe kujingulula bintu bitujimijijanga kitatyi ne kutyepeja’ko bimo. Mwendele bubandaudi bumo, mwikadi ne mwikadi mwine Amerika utalanga televijo umbula bwa nsāa 30 ku yenga! Bakwabo nabo bapityijanga kitatyi kivule mu kutanga bitabo bilupulwa na ino ntanda. Bamo-bamo bamonanga’mba kitatyi kivule kutabuka bekijimijanga mu lunango, mu makayo, mu kwipwija mukose na bakwabo nansha ku makompyuta. Pakwabo kitulomba kubandaula na katentekeji mingilo yotwingilanga difuku ne difuku, mwanda wa kuyuka mwakwingidijija senene kitatyi kyetu. Shi twingidije tunangu uno muswelo, tukatyepeja kitatyi kyotujimijanga ku bintu bya mvubu mityetye.
4 Twikalei na Ñingidijo Miyampe ya Kitatyi: Nansha shi tudi mu ngikadilo’ka, tufwaninwe batwe bonso kukūla kitatyi mwanda wa kufikila pa bitungo byetu bya kumushipiditu. Bamo-bamo baikele kumona’mba kushilula kwingila lubanga na bwēe difuku ne difuku, kwitupanga muswelo wa kupwa mingilo mivule. Umbula bwa kitatyi kyotwenda ku kaji nansha kyotwilaija bakwetu, tukokeja kutanga Bible, kuteakanya kupwila nansha kuteja mabande etulupwidile’ko Sosiete. I kyakamweno shi ba mu bisaka nabo badi na nsāa mitungwe ya kwifunda pamo ne shi beilēmekele nyeke. Shi bonso ba mu kisaka bafikanga nyeke ku kifundwa kya kisaka pa kitatyi kitungwe, nankyo umo ne umo ukamona kitatyi kya kulonga bintu bikwabo.
5 Mafuku byoenda apita, tufwaninwe netu kuyuka’mba “kubashala kitatyi kityetye tu.” (1 Kod. 7:29, MB) Būmi bwetu bwimanine pa muswelo otwingidija kino kitatyi kilēme. Shi binebine twikale kukūla kitatyi kilumbuluke mwanda wa kutūla kamweno ka Bulopwe pa kifuko kibajinji, tukeselwa.—Mat. 6:33.