Tadija Biyampe Muswelo Oingidija Kitatyi
1. I kikoleja’ka kidi na bantu dyalelo pi na pi?
1 Mu ino myaka ya bingidilwa byatyepeja kitatyi ne mingilo, bavule bamonanga bu bavudilwe bya kulonga ino babulwe kitatyi kya kwibilonga. Lelo nobe umona amba udi na kikoleja kya kulama bibidiji biyampe bya ku mushipiditu? Le wabilanga kwikala na kitatyi kivule kya kusapula? I muswelo’ka otukokeja kwingidija biyampe kitatyi kyetu?—Mit. 90:12; Fid. 1:9-11.
2, 3. I bikoleja’ka bileta myanda ya bya busendwe, ne umo ne umo ukokeja kwibandaula namani aye mwine?
2 Jingulula Bikujimijija Kitatyi: Batwe bonso tufwaninwe kwibandaula kitatyi ne kitatyi muswelo otwingidija kitatyi kyetu. Bible witusoñanya’mba: “Tuukanyai mu munangilo wenu. Kemukinangai bwa bampikwa ñenyi, poso bwa bañenyi. Kemukijimijai bitatyi bino bitupu, kwingila mpika, mwanda mafuku ano i mabi.” (Ef. 5:15, 16, MB) Tala pano bikoleja bilupuka ku kwendelela kumeso kwa myanda ya bya busendwe. Bingidilwa bya makompyuta ne bikwabo biifwene nabyo byobidi byendele’mo kwingidija, ino bikokeja kwikala bu dikinga shi ketutadijepo muswelo otwingidija’byo.—1 Kod. 7:29, 31.
3 Umo ne umo ufwaninwe kwiipangula’mba: ‘Le njimijanga kitatyi difuku ne difuku mu kutanga ne kulondolola mikanda ya ku Entelenete yambulwa ne mvubu mine? Lelo nepēne mu kwita matelefone ne mu kutuma misapu misonekwe ya bituputupu? (1 Tem. 5:13) Le nkimbanga myanda pa Entelenete yambulwa ne kyonkimbila kine nansha nshintashintanga maemisho a televijo yadi yoi ke yoi? Lelo makayo a kompyuta andilanga kitatyi kya kwifunda Kinenwa kya Leza?’ Kulondalonda bino bintu konanga būmi bwetu bwa ku mushipiditu.—Nk. 12:11.
4. I busenduludi’ka bwesendulwile nkasampe umo ne mwanda waka?
4 Ingidija Kitatyi na Tunangu: Bingidilwa bya panopano bitudila kitatyi ne kwituvulakanya. Nkasampe umo wadi wipēne mpata mu makayo a kompyuta witabija’mba: “Kyaba kimo nadi nkaya kumeso kwa kwenda mu busapudi nansha ku kupwila kwa bwine Kidishitu, ino nadi ntunya kujadika ñeni pamo. Divule nadi nanga’nka mwa kukaila biyampe makayo kampanda shi najoka ku njibo. Kifundwa kyami kya kasuku ne butangi bwa Bible byadi ke bikyendeka. Nsangaji yami ya kwingidila Leza yashilula kutyepa.” Paayukile amba ufwaninwe kushinta, wabudile makayo’a onso mu kompyuta yandi. “Uno kewadipo mwanda munekene,” ye aye uvuluka. “Nadi nswile makayo kutabuka ne monadi nangila. Ino naivwene nsangaji ya bushindañani mwanda nayukile amba kyokya kyonalonga i kya kamweno kondi.”—Mat. 5:29, 30.
5. I muswelo’ka otubwanya kukūla kitatyi kya kulonga bintu bya ku mushipiditu, ne i byabuyabuya’ka byotukamwena’mo?
5 Padi netu kudi mu bintu motufwaninwe kwisendulula uno muswelo. Le wabulwa’po kukūla kitatyi kya minite 30 ku difuku pa mingilo yambulwa kamweno? Ino i nsaa mivule yobwanya kutūla ku butangi bwa Bible mutuntulu mu bula bwa mwaka umo. Bine, ukamwena’mo mpalo ya ku mushipiditu! (Mit. 19:7-11; 119:97-100) Witūdile’ko nsaa ya kutanga Bible, kuteakanya kupwila, ne kwenda mu mwingilo wa budimi. (1 Kod. 15:58) Shi ulonge namino, ukakūla kitatyi pa mingilo pa bintu bikujimijija kitatyi kadi ukendelela na kuyuka “monka mwikadile kiswa-mutyima wa Mfumwetu.”—Ef. 5:17.