Lelo I Kijika ku Busapudi?

¹ Bantu bavule i bavudilwe bya kulonga umbūmi. Batumoni ba Yehova nabo babadilwa mu boba batyibidilwe na bya kulonga​—⁠kwifunda Kinenwa kya Leza, kutanwa ku kupwila kwa pa kipwilo, ne kutambila mu mingilo ya budimi. Kadi tudi na twaji, na mingilo ya ku njibo nansha ya ku masomo, ne na biselwa bikwabo bivulevule, byonso bino byonka bilomba kitatyi. Bine buno i bulwi bukatampe, nakampata ku mitwe ya bisaka.

² Bufudile mu myanda ya lupeto i busambakane pi na pi, mitwe ya bisaka ingila kitatyi kilampe twaji tukomo mwa kumwena twa kwikwasha nato umbūmi. Shi kaji kabebasela kitatyi kivule ne kwibapwa bukomo, bashalanga na kitatyi kityetye kya kusapula. Bakwabo balañanga amba shi abatambila mu mwingilo nansha’tu bityetye i bibabwane, mwanda badi na kiselwa kya kusāsaketa bisaka byabo. (1 Tem. 5:⁠8) Eyo, kusokola bintu bya kwikwasha nabyo umbūmi ke kunekenepo, kuletanga mitabakano mivule dyalelo. Inoko kaji kekafwaninwepo kwikala bu kijika ku kusapula myanda miyampe. (Mako 13:10) Shi ke pano, tubandaulei senene ngikadilo yotudi’mo.

³ Ngikadilo ya ino ntanda yendanga nyeke yalamuka, mutwe wa kisaka ukokeja kujimija kitatyi kivule mu kaji, mwasaka kungwija lupeto lwa kwingidija shi abatanwa na makambakano. (1 Kod. 7:31) Eyo, kaji ka mutokitoki kakokeja kumweka bu musokwe wa kutuntwila’ko bituntwa nansha wa kuvudija mikenga ya mazua nansha ya kwipwija mukose, ino lelo ako kano kabwanya kuletela kisaka nsangaji ne kuloelelwa ako kantu kajimija kitatyi kya kulondalonda tumweno twa ku mushipiditu ne kya kutanwa ku kupwila kitatyi ne kitatyi? Bine tufwaninwe kwepuka kintu kyo-kyonso kikokeja kutūla būmi bwetu bwa ku mushipiditu mu kyaka. Kulonda madingi a Yesu a ‘kwibikila lupeto lulēme momwa mūlu’ ne kwikala ‘bampeta ku meso a Leza’ kyo kintu kya tunangu.​—⁠Mat. 6:​19-21; Luka 12:​15-21.

⁴ Kimbai Bidi Tumweno twa Bulopwe: Yesu wāfundije balondi bandi kubadikija myanda ya ku mushipiditu kumeso kwa bintu byonso. Wēbasoñanya’mba: “Kemukikambakanya mityima’mba: Le tudya bika? ne byo tutoma bīne le bika? ne byo tukavwala bīne bidi pi?” Kyaānenene namino i kika? Aye mwine ushintulula’mba: “Mwanda Shenu wa mūlu uyūkile ne byo mubudilwe’byo byonso.” Shi bine tukulupile bino binenwa, kekukekalapo kijika kya kwitulekeja kulonga byobya byānene Yesu amba: “Nanshi badikilai bidi ku[kimb]a bulopwe bwa Leza, ne boloke bwandi kumo, ebiya nankyo ne byabyo byonso bikemutentekelwapo.” I amo, Leza mwine ukatenga’po kuboko! (Mat. 6:​31-33) Bine kino ke kitatyipo kya kulabikwa na kuzumbijazumbija mutyima kwakubulwa kwendela’mo pangala pa misokwe nansha pa kukimba būmi bwa maloa mu ino ngikadilo ya bintu ya lupito.​—⁠1 Pet. 5:7; 1 Yoa. 2:​15-17.

⁵ Kitungo kibajinji kyotwingidila twaji i kusokola bisakibwa byetu bya ku ngitu. Lelo abyo bine i bintu binga byotusakilwa? Mutumibwa Polo wāsonekele amba: “Byo tudi ne bidibwa, ne bivwalwa, e nabyako bidi, tuloelelwe monka.” Lelo tudi na mutyima wa kukimba bintu bivule kupita bino? Shi tudi nao, nankyo padi ketwangulanga kala bipa bibi byētudyumwine’ko Polo amba: “Boba batele mityima’mba, tusakwikala bampeta, nabya abaponena mu kutompibwa, abapi mu dikinga, ne mu bya kilokoloko kya bulembakane, ne kya byakwiletelela, bino bidi namino bitūkija bantu [ku] koneka, ne umbufudile.” (1 Tem. 6:​8, 9; Mat. 6:24; Luka 14:33) Le tukayuka namani shi ketudi batādilwe na bilokoloko bipite kipimo?

⁶ Shi kaji ketu kabetuvudila, kitatyi kya kutambila mu mingilo ya budimi ke kityetye kyotukomenwa ne kumona kyaba kya kusapula myanda miyampe, nankyo tufwaninwe kujadika bintu bya kutangidija kumeso. (Bah. 13:​15, 16) Būmi bufikile bubwanya kwitushila kyaba kya kujikula kino kijika kitubudijanga kwingila mingilo yetu ya busapudi. Tumweno twa Bulopwe to tufwaninwe nyeke kutūlwa pa kifuko kibajinji mu myanda itala kwingidija kitatyi kyetu ne bukomo bwetu.

⁷ Kuputumina mu Mingilo Ke kwa Bitupupo: Binenwa bya Polo bitukankamikanga mafuku onso nyeke amba twikale ‘kuvudilwa pakatampe pene bya kulonga mu mingilo ya Mfumwetu, mwanda tubayuka’mba, kuputumina kwa mu mingilo yetu kekudipo kwa bitupubitupu mudi Mfumwetu; ehe.’ (1 Kod. 15:58) ‘Mwingilo mwine umbajinji wa Mfumwetu’ i mwingilo wa kusapula Bulopwe ne kulonga bana-babwanga. (Mat. 24:14; 28:​19, 20) Pa kutambila byabinebine mu mwingilo wa budimi, tufwaninwe kwitūdila’ko mpangiko ku yenga ne yenga ne kulonga buninge bwa kuleka kujimija kino kitatyi ku kintu kingi shi kintu’ka shi kintu’ka. (Ef. 5:​15-17) Namino kaji ka ku ngitu ne bintu bikwabo kebiketwikadilapo bu kijika ku mwingilo wetu.

⁸ Shi twipāne mu kusapwila bakwetu bubinebine bwa mu Bible, tukemwena nsangaji ya kashā itambanga ku kupāna. (Bil. 20:35) Shi twendelele na mwingilo wa kusapula Bulopwe, tukatengela būmi bwa mu mafuku a kumeso na kikulupiji, “ke-muntu aye Leza kadipo wa bukondame wakuvulaminwa mīngilo ye[tu ne buswe bwetu bot]walombwele pa dijina dyandi.”​—⁠Bah. 6:⁠10.