Lelo Twibatyinibwe Na Mingilo?

¹ Polo wētusoñenye ‘twikale nyeke na mingilo mivule mu mwingilo wa Mfumwetu.’ (1 Kod. 15:58) Twibakankamikwe pakatampe kulama mpangiko yetu ya difuku ne difuku ya kwifunda kwa pakasuku, kutambila kitatyi ne kitatyi mu mwingilo, ne kutanwa nyeke ku kupwila ne kuvuija na bupyasakane mingilo itupebwanga pa kipwilo. Ketufwaninwepo kuvulaminwa kukwasha boba bafudilwe. Na mingilo mivule uno muswelo, tukokeja kwimona bu twibatyinibwe bininge ne kukimba muswelo wa kwepa’mo kapuji.

² Mu bitatyi bikwabo, kikokejika kwikala kya tunangu ne kilumbuluke kuleka mingilo mikwabo nansha kwītyepeja. Bantu bamo-bamo balañanga’mba bafwaninwe kulonga byonso byobebalomba kulonga. Kubulwa kwingidija biyampe kitatyi mu uno mwanda kukokeja kwikala bu nsulo mikatampe ya mitabakano ne bikambija bikwabo bikokeja kuleta makambakano mwenda mafuku.

³ Twingidijei Biyampe Kitatyi Kyetu: Kwingidija madingi a Polo etusoñanya ‘kubandaula bintu bidi na mvubu mikatampe,’ i lufungulo lwitukwasha tukengidije biyampe kitatyi kyetu. (Fid. 1:10) Kino kilombola bitupu amba tufwaninwe kwimika milangwe yetu pa bintu bifwaninwe, kupwa, kukwatañana na kitatyi kitushadile’ko ne ngikadilo yotudi’mo, ketushilula kwingila mingilo ya mvubu mityetye. Biselwa byetu bitala kisaka bidi mu mulongo wa bintu bidi pa kifuko kibajinji mu bintu byamvubu. Tufwaninwe ne kuvuija biselwa bikwabo bya kungitu. Yesu wafundije’mba butongi bwetu bwa kamweno kabajinji bufwaninwe kwimanina pa ino misoñanya’mba: Kimbai bidi Bulopwe. Tufwaninwe dibajinji kulonga bukomo bwetu bonso mwanda wa kuvuija mingilo ya kudi Yehova.​—⁠Mat. 5:3; 6:⁠33.

⁴ Na kulama uno mulangwe mu mutwe, tukapēleja mwingidijo wa kitatyi kyetu kityinibwe kala na mingilo yetu ya kungitu, kwipwija mukose ne mingilo mikwabo yakubulwa mvubu itutādile. Kitatyi kyotuteakanya mpangiko yetu ya ku yenga, twitudileiko kitatyi kibwanine kya kwifunda kwa pakasuku kufwaninwe, ne kya kutambila kubwaninine mu mwingilo, kya kutanwa ku kupwila konso ne ku bintu byonso bikwatañene na mutōtelo wetu. Kitatyi kisheleko tukokeja kwikingidija ku mingilo mikwabo, mungya mokitupela muswelo wa kufikila pa kitungo kyetu kibajinji, kyakwikala bu bakristu bengidija biyampe kitatyi batele mutyima dibajinjii ku Bulopwe.

⁵ Nansha shi tulonge uno muswelo, padi tukokeja kwendelela na kumona nyeke bu kiselwa kyetu kilemanga bininge. Pa kino, nankyo tufwaninwe kulondolola ku luno lwito lwāelele Yesu amba: “Iyai kwami bānwe bonso bakuputuma na mingilo, ne bakulemenwa, nabya nami nkemutukija’byo biyampe.” (Mat. 11:28) Twalamukilei kudi Yehova, “wakwituselela kiselwa kyetu mafuku onso mo bukila, mo bukila” ne upāna bukomo ku boba bapungile. Kakalekapo moloke kujina nansha dimo, i mwikilae. (Mit. 55:22; 68:19; Is. 40:29) Tukulupilei’mba milombelo yetu ikalondololwa, ne uketupa bwino bwa kwiendeja na kūminina mu būmi bwa kiteokratike bwa nsangaji mivule.

⁶ Shi bine tulondalondanga kamweno kayampe ka Bulopwe pakubulwa kukoka, tukokeja kuloelelwa, ke-pantu tuyukile’mba mingilo yetu yotwingidila Mfumwetu ke ya bitupubitupu’po mhm.​—⁠1 Kod. 15:⁠58.