Le Kitungo Kine I Kitungo’ka?

¹ I kika kyotwendejejanga bifundwa bya Bible ku mobo a bantu? Lelo i enka’tu kupāna buyuki, kulumbulula būmi bwa bantu, nansha kwibapa kitōkeji kya kumona būmi bwiya kumeso senene kete? Mhm. Kitungo kyetu kinekine i kulonga bantu nabo ke bana-babwanga ba Yesu Kidishitu! (Mat. 28:19; Bil. 14:21) O mwanda boba botwifunda nabo bafwaninwe kwilunga na kipwilo. Kwendelela kwabo kwa ku mushipiditu i kukwatañane mpata na mutyika obakwete nao bulongolodi bwa bwine Kidishitu.

² Mwa Kufikila’po: Tamba’nka ku ngalwilo, kankamika mwifundi kyaba ne kyaba āye atanwe ku kupwila kwa pa kipwilo. (Bah. 10:​24, 25) Mushintulwile kuno kupwila mokukaningishisha lwitabijo lwandi, mokukamukwashisha alonge kiswa-mutyima kya Leza, ne mokukamutwejeja mu kisense kiyampe na bakwabo baswile kutumbija Yehova. (Mit. 27:13; 32:8; 35:18) Kulombola kolombola abe mwine buswe ne kukwata kokwete kipwilo ne kupwila na mutyika kukamulengeja nandi kaiya kutanwa’ko.

³ Bapya bafwaninwe nabo kwimvwanija amba bulongolodi bwa Yehova i kisaka kya bu bana na bana kisambakene ntanda yonso mituntulu. Wibalombole bande wa video Les Témoins de Jéhovah : un nom, une organisation ne Toute la communauté de nos frères (Angele). Wibakwashe bayuke amba Yehova wingidijanga bantu bepāne midiyo ne midiyo kujokoloka ntanda yonso mwanda wa kulonga kiswa-mutyima kyandi. Kadi wibalombole amba nabo i betwe kwiya kwingidila Leza.​—⁠Is. 2:​2, 3.

⁴ Bine kumona mwifundi wa Bible waikala ke mwanā-bwanga wabine wa Yesu i kintu kileta nsangaji ya kasha. Kino kyo kitungo kyetu!​—⁠3 Yoa. 4.