Tuludikilei Befundi ku Bulongolodi Bwa Yehova
1 “I musapu usapulwa mu ndimi 200 ne kupita. I musapu wivwanwa mu matanda 210 ne musubu. I musapu ufikila bantu bonso, konso kobashikete. Uno i mwingilo mukatampe wa busapudi wadi kewaingilwe kashāa pano pantanda, musapu ukutyila midiyo ya bantu umbumo. Ba Tumoni twa Yehova bavuijanga uno mwingilo pano kepadi myaka katwa ne kupita!”
2 Bino i binenwa bishilula nabyo nsekununi ya bande wa video Mashahidi wa Yehova—Wanafanya Mapenzi ya Mungu kwa Umoja Ulimwenguni Pote Uno bande ulondolola ku bino bipangujo: Ba Tumoni twa Yehova, na bubine i bāni? Mwingilo wabo i mulongololwe muswelo’ka? uludikwanga namani? ne kutambanga lupeto i kwepi? Ulombola patōka ku boba bamubandila amba “ba Tumoni twa Yehova kujokoloka ntanda yonso i bantu belongolole, kadi bafundijibwe kukwasha bakwabo nabo batamije lwitabijo lwabo mu Bible,” kadi wibakankamikanga babandaule senene bulongolodi bwa ba Tumoni twa Yehova. Mwifundi umo mwana-mukaji wadidile nsangaji ne kwikala na kufwijako pa kupwa kutala uno bande, kanena’mba: “Lelo pene panopa kikomene kwivwana amba buno bo bulongolodi bwa Yehova Leza wabine i kyepi?”—Tala 1 Kodinda 14:24, 25.
3 Mwana-mukaji mukwabo wefundile Bible umbula bwa mafuku mavule na kutyibatyiba, ino kadipo witabija amba Busatu-busantu i lufundijo lwabubela. Kupwa bamulombola uno bande, aye ne mulumyandi. Batulumukile mpata pobamwene uno filime, bamutala misunsa ibidi mituntulu mu kine kyolwa’kya. Mu kifundwa kyalondele’po, mwana-mukaji wasumininwa amba usaka ekale Kamoni. Wanena’mba kufika ne pano, wakidi ukulupile na mutyima umo ku lukulupilo lwa Busatu-busantu, omwanda kadipo wipāna ku kutadija bulongolodi bwetu ne boba bebubundile. Uno bande wamukweshe ku kwivwana amba pano watana bulongolodi bwa Leza. Pakubulwa kwela kyaba, walomba kushilula kusapula ku njibo ne njibo. Bamushintulwila amba kudi matabula afwaninwe kufikila’po kumeso kwa kwikala musapudi wakubulwa kubatyijibwa, nandi wanena’mba: “Nanshi tupēlakanyei.” Watambile mu kipwilo mwaadi, washilula kusapula, pano i nsendwe wabinebine upotolwele kuponeja lufundijo lwa Busatu-busantu.
4 I kiyukane amba befundi ba Bible, pobayukanga bulongolodi bwa Yehova ne kwilunga ku abo, bendelelanga bininge kumushipiditu ne kutama bukidibukidi, ke bantu bapye. Kya kuyukila’po i kino, kupwa’tu kwa bana-babwanga 3 000 kubatyijibwa mu difuku dya Pentekosa, “badi bepāne ku bufundiji bwa batumibwa, ne kwilunga nabo.” (Bil. 2:42, NW, kkd) I kyakamweno mpata netu tukwashe befundi ba Bible balongele monka ne dyalelo. Muswelo’ka?
5 Tuvuijei Kiselwa Kyetu: Bonso baloñanga bana-babwanga bafwaninwe kuyuka na mutyima umo amba badi na kiselwa kya kuludikila befundi ba Bible ku bulongolodi bwa Leza. (1 Tem. 4:16) Kifundwa ne kifundwa kifwaninwe kikale ditabula ditwala ku difuku dya nsangaji, dya kwipāna kudi Yehova ne kubatyijibwa mu mema kwa mwana-wabwanga mupya. Kimo umbukata mwa bipangujo bipangulwanga kumeso kwa kubatyijibwa i kino: “Lelo muyukile amba na kwipāna kudi Leza ne na kubatyijibwa mubeyukanya bu ba Tumoni twa Yehova ne mubelunga ku bulongolodi bwa Leza, buludikwa na mushipiditu sandu?” Omwanda nanshi, i kya kamweno kumwivwanija amba kakokejapo kwingidila Leza pampikwa kwilunga ku kipwilo kyabine kya bwine-kristu.—Mat. 24:45-47; Yoa. 6:68; 2 Kod. 5:20.
6 Twendelelei na kwisamba na mwifundi myanda itala kipwilo kyetu ne bulongolodi bwetu bwa ba Tumoni twa Yehova kujokoloka ntanda yonso. Twikilongei yenga ne yenga, tamba’tu ku kifundwa kyetu kibajinji. Tamba ku ngalwilo, twitei mwifundi akatanwe ku kupwila kadi twendelelei na kwikilonga nyeke.—Kus. 22:17.
7 Twingidijei Bingidilwa Bitupelwe: Mabuku malumbuluke otudi nao a kwendeja nao bifundwa bya Bible ku mobo a bantu i mukanda I Kika Kisaka Leza Kotudi? ne dibuku Buyuki Butwala ku Būmi Bwanyeke. Ano mabuku abidi alombola mvubu ya kwilunga ku kipwilo. Tutanga namino kumfulo kwa kifundwa 5 mu mukanda Kisaka Leza: “Ufwaninwe kwendelela na kwifunda myanda itala padi Yehova ne kukōkela ku misoñanya yandi. Kutanwa ku kupwila ku Njibo ya Bulopwe ya ba Tumoni twa Yehova ba mu kyenu kibundi kukakukwasha pa kino.” Dibuku Buyuki dikankamika mwifundi misunsa mivule ekale kutanwa ku kupwila. Mu shapita 5, mus. 22, dita luno lwito amba: “Ba Tumoni twa Yehova . . . abakwite na kyanga kyonso, iya wilunge kobadi utōte Leza ‘mu mushipiditu ne binebine.’ (Yoano 4:24)” Mu shapita 12, mus. 16 mutangibwa’mba: “Bine, mu kwendelela na kino kifundwa ne na kwikala na kibidiji kya kutanwa ku kupwila kwa ba Tumoni twa Yehova, lwitabijo lobe lukakomejibwa bininge.” Shapita 16, mus. 20, unena’mba: “Shi kepano, witungile kitungo kya kutanwa nyeke ku kupwila kwa ba Tumoni twa Yehova.” Kadi ubweja’ko amba: “Kino kikakukwasha wivwanije ne kwingidija buyuki bwa Leza umbūmi bobe, kadi kikakuletelanga nsangaji. Kwikala mu kisaka kya bwine-kristu kya bu bana na bana, kukakukwasha wikale nyeke pabwipi na Yehova.” Shapita 17 ushintulula kamo ne kamo muswelo otukokeja kutana mutyima-ntenke wabinebine umbukata mwa bantu ba Leza. Potwifunda na bantu, tudi na kiselwa kya kutyityija milangwe ya bino bipindi bya mabuku.
8 Mukanda Mashahidi wa Yehova—Wafanya Mapenzi ya Mungu kwa Umoja Ulimwenguni Pote i kingidilwa kilumbuluke kilupwidilwe bantu, amba bayuke bulongolodi bumo kete bumweka na meso bwingidija Yehova mu ano etu mafuku mwanda wa kuvuija kiswamutyima kyandi. Myanda idi’mo ilombwelwe kamo ne kamo itala pa mwingilo wetu, kupwila ne bulongolodi, ikakankamikanga mutangi elunge kotudi mu kutōta Leza. Nanshi pashilula kifundwa kya Bible, ye ponka potufwaninwe kupa mwifundi uno mukanda amba nandi etangile’mo. Kekilombepo kwifunda’o nandi pamo na motwadi twikilongela pakala.
9 Mabande amoamo a video alupwilwe na Sosiete i bingidilwa bilumbuluke bya kuludikila nabyo befundi ba Bible ku bulongolodi bwa Yehova. Kikekala kiyampe bekale kubandila ano alonda’ko: (1) La Société du Monde Nouveau en action idi na filime ya mu 1954 ilombola patōka mutyima muyampe, kufwaninwa ne buswe bingila mu bulongolodi bwa Yehova; (2) Unis grâce à l’enseignement divin ilombola ndoe ne bumo byalombwelwe ku bitango byetu bya matanda byalongelwe mu Bulaya bwa Kutunduka, mu Amerika wa Kunshi, mu Afrika ne mu Azia; (3) Jusqu’aux extrémités de la terre uvuluka mwaka wa 50 tamba kushimikwa kwa Ngileade, Masomo a kwifunda Bible a Sosiete Watchtower, kadi ulombola ne mwingilo wingila bamishonele mu mwingilo wa busapudi kujokoloka ntanda yonso; (4) La fermeté des Témoins de Jéhovah face à la persécution nazie ufumika mānga iteneka, ya kininga ne bushindañani bwa ba Tumoni ku kupangwapangwa kwa malwa kwāletelwe na Hitler; kutentekela’po ne (5) Les Témoins de Jéhovah — Un nom, une organisation.
10 Twibatungilei Bitungo Byendelela Kumeso Bitala pa Kupwila Kwetu: Tufwaninwe kushintulwila befundi ba Bible amba eyo tudi mvubu na kwifunda kwa pabula kulondwanga ku kifundwa kya Bible kya ku njibo, ino kadi kitusakila ne kutanwa ku mīsambo ya mu kikonge, ku kupwila kwa pa kipwilo. (Yoa. 6:45) Mupya ufwaninwe kwendelela mu buyuki bwandi bwa Bisonekwa ne bwa bulongolodi pamo. Muswelo umo wa kufikila’po i kutanwa ku kupwila. (Bah. 10:23-25) Pakidi mema mu manwi, po pa kwita muntu’wa akatanwe ku kupwila kwa pa kipwilo. Bantu bavule basepelela bubinebine panopano bashilulanga kutanwa ku kupwila, ne kifundwa kyabo kine kekyaendejibwe kitatyi ne kitatyi. Omwanda tufwaninwe batwe bene kuleta’po kimfwa kilumbuluke na kutanwa’ko kitatyi ne kitatyi.—Luka 6:40; Fid. 3:17.
11 Tulombolei myanda mivule itala pa kupwila ne pa muswelo okupityijibwanga, mwanda wa mwifundi ayuke mwa kulongela. Bantu bamobamo beumbilanga pa kwenda kuntu kampanda musunsa wabo umbajinji; omwanda i kiyampe kwenda pamo na mwifundi ku Njibo ya Bulopwe kitatyi kyakatanwa ku kupwila kwandi kubajinji. Ukekala mutūkije mutyima biyampe shi tudi nandi pamo kitatyi kyobeyuka na banabetu pa kipwilo. Kushintulula ko kunena amba, twikalei bafikilwa balumbuluke: mweni wetu ufwaninwe kwimona bu mutundailwe biyampe ne mutyima wandi mushikate senene.—Mat. 7:12; Fid. 2:1-4.
12 Tukankamikei mwifundi ekale kutanwa ku kubungakana kwa pabula kwa difuku dimo, ku kubungakana kwa kipindi nansha ku kitango kya distrike kitatyi kyo kikalongwa. Padi tukokeja kwenda nandi batwe bene.
13 Tulangulei Mutyima wa Kufwijako: Tutanga mu dibuku Tumefanywa Tengenezo Tutimize Huduma Yetu, pa paje. 92, amba: “Shi mīsambo yobe na bantu basepelela bubinebine ilombola amba abe mwine ukwete bulongolodi bwa Yehova makasa abidi, kikekala kipēla ne kobadi nabo kutamija mumweno umo onka, ne kino kikebakwasha bendelele kumeso mu buyuki bwa kuyuka Yehova.” Twisambilei nyeke pa kipwilo kyetu mu bishima bya kutendela, ke na muneneno mutyanipo. (Mit. 84:10; 133:1, 3b) Mu milombelo yotulombela potwifunda, tutelei’mo ne myanda itala kipwilo kadi ne mvubu ya mwifundi kwilunga nyeke ku akyo.—Ef. 1:15-17.
14 Bine, twabilanga kumona bapya balombola kufwijako kwabo na mutyima tō ku mwanda wa kisense kilumbuluke ne mutyima-ntenke wa kumushipiditu otudi nao umbukata mwa bantu ba Leza. (1 Tem. 3:15; 1 Pet. 2:17; 5:9) Tulongei nanshi bukomo bwetu bonso bwa kuludika befundi ba Kinenwa kya Leza ku bulongolodi bwa Yehova.
[Binenwa bya Kifwatulo pa paje 3]
[Binenwa bya Kifwatulo pa paje 3]
Befundi ba Bible bendelelanga bukidibukidi kumushipiditu shi abemwena bulongolodi abo bene
[Binenwa bya Kifwatulo pa paje 4]
[Binenwa bya Kifwatulo pa paje 4]
Ketukijimijai kyaba kya kwita befundi ku kupwila