Endeja Bifundwa bya Bible Byendelela Kumeso
Kipindi 8: Kuludika Befundi ku Bulongolodi
1. Mwanda waka i kya kamweno kwisambila pa bulongolodi bwa Yehova yenga ne yenga poendeja kifundwa kya Bible?
1 Kitungo kyetu potwendeja bifundwa bya Bible ke enkapo kufundija nkulupilo ehe, i ne kukwasha befundi nabo babadilwe mu kipwilo kya bwine Kidishitu. (Zek. 8:23) Boloshile Les Témoins de Jéhovah : Qui sont-ils ? Quelles sont leurs croyances ? ukokeja kwitukwasha pa kino. Pa mwifundi umpya wa Bible boloshile umo, kupwa mukankamike atange’ye. Ne kadi ku mfulo kwa kifundwa ne kifundwa, tūla’ko minite mityetye ya kwisambila nandi pa mwanda umo utala bulongolodi bwa Yehova.
2. Tukokeja kukankamika namani befundi ba Bible bāye ku kupwila kwa pa kipwilo?
2 Kupwila kwa pa Kipwilo: Muswelo mukatampe wa kukwasha befundi ba Bible basangele bulongolodi bwa Yehova i kwibeta bāye batanwe pamo netu ku kupwila kwa pa kipwilo. (1 Kod. 14:24, 25) O mwanda, ukokeja kushilula na kwibasapwila mwikadile kupwila kwetu kutano mu yenga ne yenga, kumo ne kumo. Tela mutwe wa mwanda wa dishikulu dya bantu bonso dya yenga wiya’ko. Wibalombole i bika bikesambilwa’po ku Kifundwa kya Kiteba kya Mulami ne ku Kifundwa kya Kitabo kya pa Kipwilo. Shintulula Masomo a Mwingilo wa Kiteokratike ne Kupwila kwa Mingilo. Shi abakupe kipindi ku masomo, ukokeja padi kupituluka’kyo nabo pamo. Wibalombole myanda mikatampe yanenenwe ku kupwila. Ingidija mafoto adi mu mabuku etu mwanda wa bamone mupityilanga kupwila. Wibete tamba’tu pomushilula kifundwa kibajinji.
3. I bintu’ka bitala bulongolodi byotukokeja kwisambila’po?
3 Kitatyi kya Kivulukilo, kya kubungakana, ne kya bupempudi bwa mutadi wa kipindi pokifwena, shiya’ko minite mityetye ya kushintulula ne kutamija mutyima wandi wa kusangela ino mpangiko. Bityebitye, enda ulondolola ku bipangujo pamo bwa bino, amba: Mwanda waka tutelwa bu Batumoni ba Yehova? Mwanda waka tutela bifuko byotupwidila’po bu Mobo a Bulopwe? I mingilo’ka ingilanga bakulumpe ne bengidi ba mingilo? Busapudi ne myaba biteakanibwanga namani? Mabuku etu alupulwanga muswelo’ka? I kwepi kutambanga lupeto lwa bulongolodi? I mingilo’ka ingilwanga na bilo bya musambo ne Kitango Kyendeji mwanda wa kuludika mwingilo wa busapudi?
4, 5. Mabande etu a video akokeja kutamija namani mutyima wa kusangela bulongolodi?
4 Mabande a Video Afundija: Muswelo mukwabo wa kukwasha befundi ba Bible bamone mwikadile bulongolodi bwa Yehova butendelwa i mabande etu a video. Bande wa video Jusqu’aux extrémités de la terre ukebafikija ne ku mfulo ya ntanda, mwa kuyukila banabetu bonso na mulombwela bande wa video Toute la communauté de nos frères, ne kwibalombola motwilungile umbumo na mulombwela’kyo bande wa video Unis grâce à l’enseignement divin. Lolo umo wadi utambulanga mapepala etu ne mabuku makwabo mu bula bwa myaka itano wasumije ne impolo pa kutala bande wa video Les Témoins de Jéhovah : un nom, une organisation. Wadi ukulupile Batumoni badi bāya bamupempula, ino pa kupwa kutala bande’wa wakulupila mu bulongolodi bonso. Kifundwa kisumininwe kyashilulwa nandi, ne yenga ulonda’po watanwa ku kupwila ku Njibo ya Bulopwe.
5 Shi twitūdila’ko minite mityetye yenga ne yenga ya kwisamba na befundi ba Bible ne kwingidija bingidilwa byotudi nabyo, nabya bityebitye tukebaludika ku bulongolodi bumo kete bwingidija Yehova dyalelo.