“Nsa Kumona Kitatyi Kwepi?”
1 Mo mutompwelanga bavule umbukata mwetu, mwanda wa mingilo itutyininye. Bantu banenanga amba kitatyi kyo kituntwa kya mvubu kadi kya lupito kupita byonso byotudi nabyo. Penepo i kwepi kotukokeja kumona kitatyi kya kulonga bintu bya mvubu binebine, pamo bwa kutanga ne kwifunda Kinenwa kya Leza?—Fid. 1:10.
2 Kikatampe kisakwa ke kukimbapo kitatyi kivule, mhm, ino i kuyuka bintu bine byotufwaninwe kulonga mu kitatyi kyotudi nakyo. Batwe bonso tudi na nsaa 168 ku yenga, nsaa 100 tukokeja kupityija’yo mu tulo ne mu mingilo. Ino nsaa mikwabo ishele’ko tukokeja kwiingidija namani ku bintu bya kamweno? Efisesa 5:15-17 witulombola mwa kunangila, amba ‘ke pamopo bwa bampikwa ñeni, mhm, poso bwa bañeni; ne kukūla kitatyi kifwaninwe ne kuyuka monka mwikadile kiswa-mutyima kya Yehova.’ Kino kilombola amba tufwaninwe kukwatakanya byabinebine mukenga o-onso mwanda wa kulonga bintu bimwene Yehova bu bya mvubu.
3 Yesu wādingakenye mafuku otudi’mo na mafuku a Noa. (Luka 17:26, 27) Bantu ba mu oa mafuku bādi betumpile mu mingilo yabo ya difuku ne difuku. Ino Noa aye wāmona’ko ne kitatyi kya kupopa safini mipuñame ne kya kusapula. (Bah. 11:7; 2 Pet. 2:5) Le wēkimwene namani? I na kutūla kiswa-mutyima kya Leza pa kifuko kibajinji ne kukōkela na kulonga bintu “monka” mwādi munenena Leza.—Ngal. 6:22.
4 I Bika bya Kutangidija Kumeso? Yesu wānene amba: “Muntu nanshi kakamwenapo būmi mu mikate yonka, mhm, poso mu myanda yonso ītamba mu kyakanwa kya Mwine Leza.” (Mat. 4:4) Yenga ne yenga tutambulanga ‘bidibwa bya ku mushipiditu pa kitatyi kifwaninwe.’ (Luka 12:42) Kino kitulomba kwitūdila’ko mpangiko ya kutanga ne kwifunda kitatyi ne kitatyi pa kasuku mwa kutūkijija biyampe bino bidibwa byonso shi tusaka kumwena’mo byabinebine. Kufwija Yehova pangala pa bino bidibwa bya ku mushipiditu kuketupa mutyima wa kuleka kudya’byo na kwipangila pamo bwa batwe bobapanga, na mudilwanga mu leshitola ya byakudya bya lubilolubilo. Ino kufwija’ko kwendele’mo ko kwa kwitutonona twitūdile’ko kitatyi kya kwifunda ne kwivwana munsonso wa bintu bya ku mushipiditu.
5 Kudya byakudya bya ku mushipiditu kukokeja kwitupeja būmi bwa nyeke. (Yoa. 17:3) Kufwaninwe kutūlwa pa kifuko kibajinji mu mpangiko yetu ya difuku ne difuku. Lelo bine tukokeja kwitūdila’ko kitatyi kya kutanga Bible difuku ne difuku ne kuteakanya kupwila kwa bwine Kidishitu? Eyo, tukokeja. Shi tulonge namino, tukatambula “mpalo mikatakata” itamba ku kuyuka ne kulonga kiswa-mutyima kya Leza.—Mit. 19:7-11.