Tamija Manwa Obe a Kwimvwanija
1 Ano mafuku a mfulo, a malwa, otudi’mo ano, apapamwinanga bantu ba Leza ba konso konso mitabakano mivule ne bikambija bikomokomo bya miswelo ne miswelo. (2 Tem. 3:1-5) O mwanda batwe bonso tusakilwa kukankamikwa mwa kushadila bemanije mu lwitabijo. (1 Kod. 16:13) Tubwanya kukankamikwa na bukwashi bwa Yehova shi twendelela nyeke kudya ku kyandi Kinenwa kitatyi ne kitatyi, kukulupila mu mushipiditu wandi, ne kulamata ku bulongolodi bwandi.—Mit. 37:28; Loma 8:38, 39; Kus. 2:10.
2 Nanshi mutwe wa mwanda unena amba “Ikalai Batame mu Manwa a Kwimvwanija” wavungulwilwe mu mpangiko ya kubungakana kwa pa bula kwa difuku dimo kwa mwaka wadi’mo wadi mufike’po. Wadi wimanine pa 1 Kodinda 14:20 (NW), potutanga binenwa bya Polo amba: “Banabetu, kemukikalai bana batyetye mu manwa a kwimvwanija, ino ikalai bana ba lukeke mu bibi; inoko ikalai batame mu manwa a kwimvwanija.” Le wamwene namani ino mpangiko?
3 “Bine ibetukankamika’po kashā!” “Ino yo myanda mine yotwadi tusakilwa!” Bino byo binenwa byanenene bantu babidi mu bāile kutanwa’ko. Nansha ke shabana umo wakubulwa kwikala Kamoni, wāile kutanwa pabatyijibwa wandi mwana nsongwakaji wa myaka 12, nandi wānene amba ino mpangiko ibantulumuja mpata, nkatala nami moikankwashisha mu kyami kisaka. Lelo ye mowamwenene nobe nankyo? Shi ke pano, twivulujei’ko bidi myanda imoimo ya mu ino mpangiko.
4 Pa Kutamija Manwa Etu a Kwimvwanija, Tufwaninwe Kwikala na Buyuki Bwabinebine: Mu kishinte kya ñanjilo kinena’mba, “Tamija Manwa Obe a Kwimvwanija Tamba’nka Pano,” lelo muneni wanene ukoma kintu’ka kyotusakilwa mwa kulwila na makambakano a dyalelo? Ke bukomopo bwa ñeni bonkabonka, mhm. Ino tufwaninwe kutamija ne kuvudija manwa etu a kwimvwanija Bible, shi bitupu tukanekenibwa na bibi byonso bitujokolokele. Pa kwikala na kuno kwimvwanija tufwaninwe kuludikwa na Leza. Tufwaninwe, pamo bwa mulembi wa mitōto, kulomba Yehova etwimvwanije bijila byandi ne bivulujo byandi mwanda wa tumwingidile na mutyima umo.—Mit. 119:1, 2, 34.
5 Mu kipindi kikwabo, mutadi wa kipindi walombwele amba Yehova, kupityila ku Kinenwa kyandi ne ku bulongolodi bwandi, witupanga “Bintu bya Kwitukwasha Twikale Batame mu Kwimvwanija Bible.” Washintulwile amba kwimvwanija i “bwino bwa kujingulula mwanda ne kupotolola senene kukwatañana kukwatañene tumyanda tutyetutye na mwanda mwine, ku mfulo waivwanija buluji bwao senene.” Le i bāni bakokeja kwitukwasha tutamije buno bwino? Yehova i mwitupe bantu bu byabuntu ba kwitukwasha twendelele ku mushipiditu. (Ef. 4:11, 12) Bulongolodi bwandi bwa pano panshi bwitukankamika tutange Kinenwa kya Leza difuku ne difuku ne kutanwa nyeke ku kupwila konso kwa pa kipwilo. (Mit. 1:2) Betufundijanga ne mwa kwingidija Bible ne mabuku a bwine Kidishitu mu kifundwa kya kasuku, kya kisaka, ne potuteakanya kupwila kwa pa kipwilo ne kwa kutambila mu mwingilo wa budimi. Lelo nobe umwenanga mu ino mpangiko yonso? Lelo ulondanga nyeke mpangiko ya kutanga Bible kitatyi ne kitatyi? Kulonga namino kudi na mvubu kutyina amba twakaponena mu bisela, bipupo bipupa bantu, mafilozofi, ne mu bintu bya kyongo bya ino ntanda.—Kol. 2:6-8.
6 Tufwaninwe Kutamija Manwa Etu a Kwimvwanija: Muneni umpempudi, mu kishinte kyandi kibajinji kinena amba “Kwatakanya Būmi Bobe bwa ku Mushipiditu na Kutamija Manwa Obe a Kuyuka Kwimvwanija,” washintulwile amba bantu ba ino ntanda kebayukilepo kushiyañanya kiyampe ne kibi. (Is. 5: 20, 21) Kyobakambakena namino i kupela kobapelele kwitabija ne kulonda misoñanya myoloke ya Leza. Ino batwe batambula bufundiji bwa ku mushipiditu mu bulongolodi bwa Yehova twitabije misoñanya yandi ituludike mu byotulonga ne mu mwiendelejo wetu. O mwanda tubwanya kwijingulwila batwe bene bintu bilumbuluke, bitabijibwe ku meso a Yehova, bikwatañene na kiswa-mutyima kyandi kibwaninine.—Loma 12:2.
7 Pa kusaka twepuke mulangilo mutyompakane wa ino ntanda ne bipa bibole bitamba’ko, tufwaninwe kutamija nyeke manwa etu a kwimvwanija. Le tukeatamija namani? Mu Bahebelu 5:12-14, mutumibwa Polo unena’mo ukoma mvubu yoketufwaninwepo kutomena’nka ‘mabele’ a kinenwa kete. Ino tufwaninwe kudya ne bidibwa bikomo bya ku mushipiditu, pamo na byotukadya pa kwifunda bupolofeto bwa Isaya mu Kifundwa kya Kitabo. Kadi tufwaninwe kwingidija ne kulongela bukidi bonka mwendele byotwifunda’bya. Shi tulonge namino, tukalombola amba twitabije amba bijila ne misoñanya ya Yehova i byoloke. Kino kikatamija manwa etu a kusansanya kiyampe ne kibi.
8 Ino i kya bulanda, bamo baponanga ku mushipiditu. Mwanda waka? Mwanda kebatangapo mutyima ku bintu bilumbuluke ne byoloke ku meso a Yehova. Kino kibaponenejanga mu binenwa bibole bya ku maladiyo ne matelevijo bipelelwe mu Bisonekwa, minjiki ya bukobakane, nansha mateba a Entelenete. Shi twikale na tunangu, ketukaponenapo mu makasa a bisekese, a bivila nansha a babi.—Nk. 13:20; Ngat. 5:7; 1 Tem. 6:20, 21.
9 Bankasampe Bafwaninwe Kwikala “Bana ba Lukeke mu Bibi”: Ino mpangiko yadi na bipindi bibidi byaikele kukankamika mpata bankasampe batamije manwa abo a kwimvwanija. Muneni walombwele amba kwikala “bana ba lukeke mu bibi” kishintulula kushala nyeke bakubulwa kuyuka kabubi nansha kamo, bantu bakubulwa mwanda pamo’nka bwa bana ba lukeke mu myanda ya kulonga bintu bya disubi ku meso a Yehova. (1 Kod. 14:20) Batwe bonso twakankamikilwe kutadija mpata muswelo otwingidija kitatyi kyetu kutyina amba twaketūla bu byambo ku miswelo yonso ya bintu bibi ne kusubijibwa nabyo. (Ef. 5:15-17) Twakankamikilwe kupikula kitatyi kyotupityijanga mu kutanga bintu kebikokejapo kwitutamija bininge mu kwimvwanija bintu bya ku mushipiditu. Lelo nobe upikulanga’kyo? Popikulanga, umonanga namani? Kutentekela pa kutanga kotanga Bible difuku ne difuku, sumininwa ne mu kutanga nyeke mabuku etulupwila bulongolodi. Kulonga namino kuketukwasha batwe bonso, ne bankasampe bene kumo, twikale na “kwivwanija.”—Nk. 4:7-9.
10 “Mwenai Kamweno mu Kulonda Misoñanya ya mu Bible na Kwimvwanija”: Uno o wadi mutwe wa mwanda wa kishinte kya mfulo kya ku mpangiko ya kubungakana kwa pa bula kwa difuku dimo. Muneni umpempudi washintulwile amba Yehova ye Nsulo ya kwimvwanija kuleta būmi, kupityile kulampe kwivwanija kwa bantu bonsololo. Langa’po bidi nansha ke abe, kumona mukenga wa kwitapwila abe mwine mu kwivwanija kwa Yehova! Upānanga’ko ku boba bekukimba na mikeketo ne bamulomba’ko na lwitabijo. (NK. 2:3-5, 9; 28:5) Lelo umwenanga byabinebine mu kino kyabuntu kyakupele?
11 Betukankamikile kwifunda kujingulula misoñanya ponso potutanga Bible. (2 Tem. 3:16, 17) Wifunde’yo senene shē mwa kwikadila na kwimvwanija kwabinebine kwa myanda inena Yehova. Witūdile’ko kitatyi kya kulanguluka’po ne kwiilama mu ñeni yobe ne mu mutyima obe. Bino byo bikatamija manwa obe a kwimvwanija ne kunekenya bintu senene kyaba kyonso kyotyiba mbila mu būmi bobe. (Yos. 1:8) Shi ke pano, twisambilei pa ngikadilo imoimo itanwanga’mo bavule, kupwa tutale kwingidija misoñanya ya mu Bible mokukokeja kwitukwashisha tunekenye ino ngikadilo.
12 ‘Lelo Mfwaninwe Kwiula Muvwadilo ne Mwidyangwilo Kampanda?’ Divule muvwadilo ne mwidyangwilo wa bukobakane wa ino ntanda ulombolanga mushipiditu wa butomboki. Uno mushipiditu ye utonona bantu kuvwala bya busenga nansha kwilumbila bintu bilangula bilokoloko bya busekese. I misoñanya’ka ya mu Bible ikwatañene na ino myanda ya kwitukwasha tulwe na ino ngikadilo? Byotupwile kala kutamija manwa etu a kwimvwanija, ketukabulwepo kuta mutyima ku musoñanya utanwa mu 1 Tem. 2:9, 10, witunena kuvwala ‘pa mvwadilo ne bumvubumvu, mu muswelo ufwaninwe bantu banena amba balēmekele Leza.’ Misoñanya mikwabo ikwatañene na ino myanda itanwa mu 2 Kodinda 6:3 ne mu Kolose 3:18, 20.
13 ‘Le Nonge Namani Kijimba kya Bumo bwa Kisaka Kyami Kikale Nyeke Kininge?’ Kwisambila pamo na ba mu kisaka i kuyampe mpata. Yakoba 1:19 witulombola’mba: “Bantu bonso bapeje pa kwivwana, bēje pa kwisamba, ne pa kukalabala napo, mo monka bējepo.” Ba mu kisaka bafwaninwe kwiteja ne kwisamba abo bene na bene mwanda kwisamba mu kisaka i pamo bwa bulundu bwa kwitumina. Ino nansha shi byotunena i byabine, shi tunena’byo na nsuminiji, na kibengo, nansha na kusanshija, bikabipija mpata pa kyaba kya kukwasha. Nanshi, twikale balume nansha bakaji, bambutwile nansha bana, binenwa byetu bifwaninwe nyeke kwikala “ne buntu bwa mwepo wa kwelwamo.”—Kol. 4:6.
14 ‘Lelo Kendi na Mushipiditu wa Kusanswa Byabupeta?’ Kusanswa bya bupeta i kipupo kya ino ntanda kidyambakanya būmi bwa bantu. Ke lufungulopo lutwala ku nsangaji. (Mus. 5:10; Luka 12:15; 1 Tem. 6:9, 10) Yesu wetufundije musoñanya wa mvubu mwanda wa kwitukwasha tuleke kupya mu dikinga dya kulondalonda bya bupeta, wānena’mba: Ikalai na diso ditūkanye. Pa kwikala na būmi bujalale, bwakubulwa bikambija bivule, kilomba kubambila meso etu pa tumweno twa bulopwe, bintu byonso kebilonda.—Mat. 6:22, 23, 33.
15 Tufwaninwe Kwikala na Kitungo’ka?: Kinenwa kya Leza i nsulo ya misoñanya ya boloke ikulupilwa ya kwitukwasha potutyiba mbila. Tufwaninwe kwifunda ino misoñanya, kulanguluka’po ne kwimvwanija senene muswelo wa kwiingidija mu bwetu būmi. Kutamija ‘kotutamija manwa etu a kwimvwanija, mwa kushiyañenya biyampe ne bibi’ kuketumweja byabuyabuya bivule ne kupeja Yehova bulēme.—Bah. 5:14.