Byabuyabuya Byotumwena mu Kufwija’ko Yehova Pangala pa Buswe Bwandi—Kipindi 1
1 Mutumibwa Yoano wāsonekele amba: “Bātwe tumuswele [Yehova] mwanda aye ye umbajinji kwituswa.” (1 Yoa. 4:19) Ponso potulanguluka pa byonso bitulongela Yehova, mutyima witutononanga tumufwije’ko bininge. Yesu wāletele kifwa kiyampe mu uno mwanda, wādi usapula dijina dya Leza ne Bulopwe bwandi na kikōkeji. (Yoa. 14:31) Nanshi i biyampe tubandaule miswelo imoimo ya kulombola kufwija’ko kwetu pangala pa buswe bwa Yehova ne madyese otweselwa.
2 Kwenda ku Njibo ne Njibo: Yesu wāfundije bandi bana-babwanga mwa kwingidila mwingilo wa kusapula Bulopwe. Bulombodi bwāebapele bulombola patōkelela amba bādi benda ku njibo ne njibo, benda bayukanya myanda miyampe. (Luka 9:1-6; 10:1-7) Kwenda nyeke ku njibo ne njibo, kuntu kotutana buñumauma ne kupangwapangwa, ke kunekenepo, kilomba buswe bwabinebine bwa kuswa Leza ne bantu netu. Ino kwenda kotwenda’ko kwituletelanga byabuyabuya, ke-pantu lwitabijo lwetu lukomejibwanga, kikulupiji kyetu kininga, ne lukulupilo lwetu nalo lwamweka patōka.
3 Byotwingila koku twendejibwa na bamwikeulu, tutananga bantu bavule badi na nzala ne kyumwa kya bubinebine. (Kus. 14:6) Divule bene njibo banenanga amba kitatyi kyobadi balomba bukwashi mu milombelo kyo kitatyi kyadi kīya Batumoni ku mobo abo. Bakaka babidi ne mwanuke umo bādi benda basapula ku njibo ne njibo mu kisanga kya Karaibe. Mu kitatyi kampanda, bakaka banena amba twimanine pano mu dyalelo, ino mwana weendela aye mwine ku njibo ilonda’ko, wakokola ku mulango. Amba batale nsongwakaji umo wamufungwila mulango. Bakaka pa kumona nabya, bamulonda ne kwisamba besamba na nsongwakaji. Webeta amba twelai, webalombola amba nadi nombela Leza antumine Batumoni bāye bamfundije Bible.
4 Kusapula mu Bipito: Mu bipindi bimo kikalanga kikomo kutana bantu ku mobo, o mwanda busapudi bwa mu bipito i muswelo muyampe wa kwibasapwila. Ne kadi bantu bavule bashikete mu mikenza mijokolokwe na mpango, nansha mobo malamibwe na balungu mukoma kusapula ku njibo ne njibo. Ino kufwija kotufwija’ko Yehova pangala pa buswe bwandi kwitutononanga tukwatakanye kamukenga ko-konso ka kwitana na bantu ne kwibasapwila musapu wa Bulopwe, kifwa mu busapudi bwa mu bipito.—Nk. 1:20, 21.
5 Kulonga Kujokela’mo Kupya: Byotukimbanga “boba beyukile bisakibwa byabo bya ku mushipiditu,” tufwaninwe kulonga bukomo bwetu bonso mwa kuvuila bine bisakibwa’bi. (Mat. 5:3, NW) Kino kilomba kujokela’ko ne kusangila nkunwa ya bubinebine yotwakunine. (1 Kod. 3:6-8) Mu Ostrali, kaka umo wapele mwana-mukaji umo trakte, uno lolo wadi umweka bu kasangelapo musapu bininge. Ino kaka aye waninga kukamupempula monka ku njibo. Pa kumutana, wajingulula amba, kupwa’tu kwa kwitana kubajinji kobetene, uno lolo wakapotele Bible wa bei mikande. Ebiya kaka washilula kwifunda nandi.
6 Kwendeja Bifundwa bya Bible: Kino kikokeja kwikala kipindi kisangaja, kileta mpalo mu mwingilo wetu. Bine, i dyese dikatampe pa kukwasha bantu befunde kuyuka Yehova, pa kwibamona bālamuka mu būmi bwabo mwanda wa kumusangaja, ne kwibamona babatyijibwa lubatyijo lwa bwine Kidishitu mwanda wa kulombola kwipāna kobepēne kudi Leza!—1 Tes. 2:20; 3 Yoa. 4.
7 Mu nimelo ilonda’ko, tukesambila pa miswelo mikwabo yotweselwa madyese mwanda wa kufwija kotufwija’ko Yehova pangala pa buswe bwandi.