Byabuyabuya Byotumwena mu Kufwija’ko Yehova Pangala pa Buswe Bwandi—Kipindi 2
1 Mu kipindi kyanenwe Kweji wapityile’u pa uno mutwe wa mwanda, twesambīle pa miswelo iná ya kulombola kufwija’ko kwetu pangala pa buswe bwa Yehova mu mwingilo wetu. (1 Yoa. 4:9-11) Pano kadi tusa kubweja’ko miswelo mikwabo itano ya mwa kumwena bino byabuyabuya. Shi twipāna byabinebine mu kukwasha bakwetu ku mushipiditu nankyo twi ba dyese ne dyese’po.
2 Busapudi bwa Kiponka na Ponka: Uno i muswelo mulumbuluke wa kutana bantu badi na nzala ne kyumwa kya boloke, ne wa kwibapa mabuku a kwibakwasha. I biyampe ‘kukūla kitatyi kifwaninwe’ ne kusapwila bonso botwitana nabo ponso potumona mukenga. (Ef. 5:16) Eyo, tufwaninwe kwikala shetu na kininga kyabinebine pa kusapula uno muswelo, ino shi twikale na mutyima wa kufwija’ko Leza pangala pa buswe bwandi, ketukabulwepo kusapula ponso potumona mukenga.—2 Tem. 1:7, 8.
3 Mishonele umo waeselwe dyese dikatampe mwanda wa kushilula kwaāshilwile mīsambo na muntu obādi benda nandi mu motoka. Uno muntu wasangela musapu. Kupwa mishonele wamupempula misunsa mivule, bashilula nandi ne kifundwa kya Bible. Uno mukelenge waitabija bubinebine, waendelela kufika ne ku kwikala mukulumpe pa kipwilo!
4 Kulemba Mikanda: Padi tukomenwe kwenda ku njibo ne njibo shi pa mwanda wa bulema kampanda botudi nabo, shi pa mwanda wa kūlu kubipile. Pa kino tukokeja kwandika mikanda ya kusapwila mu kīpi boba botwiyukile nabo, boba bafwidilwe bakena babo, nansha boba boketwatenepo ku njibo mu wetu mwaba. Tubwanya kukuja’mo ne trakte mufike’po wisambila pa musapu usangaja wa mu Bible ne kukankamika yewa ukatambula uno mukanda etulondolole shi udi’po na bipangujo. Ingidija adelese yobe nansha ya ku Njibo ya Bulopwe, kokolwa kwingidija adelese ya bilo ya musambo.
5 Busapudi bwa ku Telefone: Uno o muswelo mulumbuluke wa kwisamba na bantu botukomenwanga kutana mu mwingilo wetu wa ku njibo ne njibo. Shi tulonge namino na bunwa, na kanye, na budyumuku, ne na bwino, bantu baketwitaba senene. Mwingilo Wetu wa Bulopwe wa Kweji 2, 2001, pa paje 5-6, witupa madingi mafwaninwe a mwa kulupwila bipa bilumbuluke.
6 Kaka umo wādi usapula busapudi bwa ku telefone, waipangula mwana-mukaji umo shi nandi kadi mute mutyima ku būmi bwandi bwa kumeso ne bwa kyandi kisaka. Uno lolo waitabija amba utele’ko mutyima. Wamuyukija ne kumuyukija amba i mutyumukwe mutyima mpata o mwanda i mwitolwele bunka bwandi ku njibo. Uno lolo pa kutengwa na kuno kuta kwamutele uno kaka mutyima, wāmulaya amba twitane mu nsoko ya pabwipi na pabo. Ku mfulo, uno lolo waitabija bukidi bonka kifundwa kya Bible!
7 Kulubula Beni: Shi tusenswe bakwetu, tukata mutyima ku mweni ye-yense wiya kwitupempula mu kifuko motupwidilanga ne kumulubula na kizaji. (Loma 15:7) Tufwaninwe kumukwatakanya emone amba udi umbukata mwa boba batele mutyima byabinebine ku ngikadilo yandi ya ku mushipiditu. Kuta kotukamuta mutyima ne kumunena kwifunda nandi Bible kukamutonona etabije bukwashi bwetu.
8 Mwiendelejo Wetu Mulumbuluke: Mwiendelejo wetu mulumbuluke ye otuneñenyanga nao bubinebine. (Tet. 2:10) Kyaba kinenanga bantu ba ino ntanda maya pangala pa batwe Batumoni ba Yehova, i Leza obatumbijanga ntumbo. (1 Pet. 2:12) Kino kikokeja kukwasha ne bakwetu nabo bashilule kulonda dishinda ditwala ku būmi.
9 Wabulwa’po nobe kubandaula ino miswelo itano ya mwa kulombwela kufwija’ko kwetu pangala pa buswe bukatakata bwa Yehova bwaetuswele ne kulonda’yo mu busapudi? (1 Yoa. 4:16) Wivwane ulonge namino, ukeselwa madyese mavule.