Busapudi bwa ku Telefone Bukokeja Kupa Bipa
1. Le mwanda waka tumone busapudi bwa ku telefone bu bwa kamweno mu mwingilo wetu?
1 Mwanda waka tute mutyima ku busapudi bwa ku telefone mu mwingilo wetu? Mwanda nao i muswelo wa kukwasha bantu bakwabo bekale na buyuki bwa binebine mwanda wa kukapanda. (2 Pet. 3:9) Nansha shi busapudi bwa ku njibo ne njibo o muswelo umbajinji otuyukanyanga myanda miyampe ya Bulopwe bwa Leza, tusakanga kwingidija ne miswelo mikwabo mwanda wa kusapwila boba kebatanwapo ku abo mobo.—Mat. 24:14; Luka 10:1-7; Kus. 14:6.
2. Lelo busapudi bwa ku telefone butekanibwanga namani?
2 Mobulongolwedilwe: Pamo na mwikadile mpangiko ya mwingilo wa budimi wa ku njibo ne njibo, basapudi bakokeja kupebwa ne mwaba wa busapudi bwa ku telefone. Bukokeja kusapulwa bunka nansha na kakibumbo katyetye ka bantu babidi nansha basatu. I biyampe kifuko kya kusapwila’mo ku telefone kikale talala. Bavule bamonanga amba i biyampe kushikata ku meza ne kutula’po bingidilwa byobendanga nabyo mu busapudi bwa ku njibo ne njibo.
3. Lelo i bika byotufwaninwe kuvuluka potusapula ku telefone?
3 Mwa Kusapwila ku Telefone: Kitatyi kyo tusapula ku telefone, musapwilo wetu ufwaninwe kwikala usangaja bantu. Bamo bakishilulashilula’bo bakokeja kutangila obesamba nandi bilembwa kampanda ino na aye wisamba’byo. Ntwelelo idi mu dibuku Comment raisonner, Mwingilo Wetu wa Bulopwe, ne trakte Lelo Usaka Kuyuka Bubinebine? ikokeja kukwasha pa uno mwanda. Kitatyi kyowiteakanya tonga mutwe wa mwanda, longolola kipangujo, ne kuteakanya bisonekwa bityetye bya kulondolola nabyo. Mungya buluji ukesambila pa mabuku amo onka a kupāna mu kweji’wa mu busapudi bwa ku njibo ne njibo. Ta mutyima ku bivulujo bilonda’ko: Nena na mutyima mutūke kadi bityebitye. Ikala wa bulēme, wa kitūkijetyima ne wa bulunda, bino byonso mwanda bivwanikanga ne mu mīsambo ya ku telefone. Teja mwimvwaniki pashintulula byalanga, kupwa itabija kadi mufwije’ko pa byaanena. Ta mutyima kokanena myanda itala byabuntu, kutyina yakevwanikwa bibi na abe ulomba lupeto ku telefone.
4. Le busapudi bwa ku telefone bwitukwashanga tulonge bika mu mwaba wetu.
4 Muntu osapwila ku telefone ukokeja kwikala mutyumukile panshi nansha yewa mutyinibwe na kaji, katanwapo kwandi mu busapudi bwa ku njibo ne njibo. Bakwabo badi mu mobo mashityile mu lupango nansha ku mobo alamwa. Nanshi, potulonga bukomo bwa kuvuija mwingilo wetu ne pa mfulo ne kusambakanya musapu konso konso, tutei mutyima ketukilwai kusapula kupityila ku telefone ke-pantu i musapwilo upa bipa.