Shilula Bifundwa bya Bible bya pa Kibelo ne bya ku Telefone
1, 2. I muswelo’ka otukokeja kukwatañanya mpangiko ya kwifunda Bible na bantu bavudilwe bya kulonga?
1 Bantu dyalelo i bavudilwe bya kulonga. Ino bavule batele mutyima ku bintu bya ku mushipiditu. Le tukebakwasha namani bavuije bisakibwa byabo bya ku mushipiditu? (Mat. 5:3) Basapudi bavule babwanya kwifunda Bible na bantu pa bibelo byabo nansha ku telefone. Mwene nobe ubwanya kutandabula mwingilo obe mu uno muswelo?
2 Pa kushilula bifundwa bya Bible tufwaninwe bidi kwiteakanya mwa kulombwela mwifundilwanga Bible ponso potumona mukenga. Le tukalonga kino muswelo’ka ne kwepi?
3. Mwanda waka i biyampe kulombola mwifundilwanga Bible mu kwitana kubajinji, ne tukalombola’kyo muswelo’ka?
3 Pa Kibelo: Shi ubetana na muntu usaka kwisambila pa Bible, pūtula’tu pa musango oteakenye kala, kimfwa musango umbajinji wa kifundwa 1 mu boloshile Kisaka Leza ne kushilula. Tanga musango, kupwa ipangula kipangujo, ne kwisambila pa kisonekwa kimo nansha bibidi bitelelwe’mo. Pangi pene bilomba minite itano nansha dikumi pa kulonga kino pa kibelo. Shi muntu wasangela mīsambo, nabya kwata mpangiko ya kwiya kubandaula musango umo nansha ibidi ilonda’ko kitatyi kikwabo.—Madingi makwabo a misapwilo ya mwa kushilwila bifundwa itanwa mu Mwingilo Wetu wa Bulopwe wa Kweji 1, 2002 p. 6.
4. I muswelo’ka otukokeja kushilula kifundwa kya Bible kya pa kibelo mu kujokela’mo kupya?
4 Musapwilo wa uno muswelo ukokeja kwingidijibwa pa kushilula bifundwa bya Bible mu kujokela’mo kupya. Kimfwa, ukokeja kulombola boloshile Kisaka Leza na kwisambila pa dijina dya Leza, mu kifundwa 2, musango 1-2. Mu kujokela’mo kukwabo, ubwanya kwisambila pa binena Bible pa ngikadilo ya Yehova, na kwingidija musango wa 3-4. Kupwa ukendeleja mīsambo na kubandaula musango wa 5-6 ne kifwatulo kidi pa paje 5 mwanda wa kukoma amba kifundwa kya Bible kitukwasha tuyuke Yehova. Byonso bino bikokeja kulongwa enka pomwimene pa kibelo’pa.
5, 6. (a) Mwanda waka bamo basangelanga kwifunda Bible kupityila ku telefone? (b) I musapwilo’ka otukokeja kwingidija pa kushilula kifundwa kya ku telefone?
5 Ku Telefone: Bantu bamo padi basaka kwifunda Bible kupityila ku telefone kupita’ko bemwene mpala na mpala. Ivwana mwanda mumweke ulonda’ko uno: Kaka umo wadi usapula ku njibo ne njibo, wetana na nsongwakaji inabana kadi udi pa kaji ka mingilo mivule. Kaka kadipo ubwanya kumutana ponka ku njibo o mwanda wasakile kumwita ku telefone. Nsongwakaji’wa wamushintulwila amba bine kadipo na kyaba kya kwisambila pa Bible. Kaka wamunena amba: “Mu minite 10 nansha 15 ukokeja kwifunda kintu kampanda kipya kupityila ku telefone.” “Biyampe, shi ku telefone, nabya ngitabije!” ye nsongwakaji unena. Ne kwija mpika, baendelela na kwifunda kitatyi ne kitatyi ku telefone.
6 Mwene bamo mu boba bopempulanga bakokeja kusangela kwifunda ku telefone? Ubwanya kutompa uno musapwilo otwanenanga, nansha kunena’tu amba: “Shi uswile, tubwanya kwisambila pa Bible ku telefone. Le bikusangaja?” Bine, shi tukwatañanya mpangiko ya kwifunda Bible na ngikadilo idi’mo bakwetu, ketukabulwepo kwibakwasha batane “kuyukidija Leza.”—Nk. 2:5; 1 Kod. 9:23.