Endeja Bifundwa bya Bible bya pa Kibelo ne bya ku Telefone Byendelela Kumeso
1. Lelo i kitungo’ka kine kyotwendejeja bifundwa bya Bible?
1 Buya’byopo kushilula kifundwa kya Bible! Inoko, kusokola muntu usangela kwifunda Bible i ngalwilo’tu ya mwingilo. Ke-pantu kitungo kifundilwa i kukwasha muntu ekale mwanā bwanga wa binebine wa Kidishitu. (Mat. 28:19, 20) Penepa i bika biketukwasha tufikile pa kino kitungo?
2. Lelo bifundwa bya pa bibelo ne bya ku telefone i bifundwa bya muswelo’ka, ne mwanda waka i byendele’mo?
2 Bantu Bavudilwe bya Kulonga: Dyalelo bantu i bavudilwe bya kulonga. Mu bifuko bimo, padi i bantu batyetye’tu bakokeja kwitabija kwifunda Bible mu bula bwa nsaa mutuntulu. Pa kusaka kwibasapwila, twikalei kushilula ne kwendeja bifundwa bya Bible pa bibelo nansha ku telefone. Dibajinji, bifundwa bya uno muswelo bifwaninwe kwikala bīpi bimanine pa kubandaula bisonekwa bityetye ne musango umo nansha ibidi mu kitabo kampanda, kimfwa mu dibuku Bifundija Bible. Bine, basapudi bavule pano kebashilule kala kwendeja bifundwa bya pa bibelo ne bya ku telefone!
3. Mwanda waka tufwaninwe kupityija kitatyi kilampe potwendeja kifundwa kya pa kibelo?
3 Le tukemanina nyeke’nka pa kwendeja bifundwa bya pa kibelo? Mhm. Nansha byobidi biyampe kuleka kunena bilabila potushilula kifundwa musunsa umbajinji, ino Mwingilo Wetu wa Bulopwe wa Kweji 12, 1990, pa paje 8, wānene amba: “Shi enka tubashinsakanya kifundwa ne muntu wasangela musapu kupityidila, papo tukokeja kulepeja kifundwa.” Kino kidi na kamweno. Tulete kimfwa: Mwana ufwa nzala ukokeja kudishibwa bidibwa bipēla mwanda wa kulangula monka ndyoko yandi, ino pa kusaka ekale mukomo nkē, kakemaninapo’nka pa bidibwa bipēla’bya myeji ne myeji. Mo monka mwifundi wa Bible nandi usakilwa kifundwa ne bukwashi buvule pa kusaka atame ne kwikala mwingidi wa Leza mupye.—Bah. 5:13, 14.
4. I byabuyabuya’ka bimwenwa mu kwifundila Bible ku njibo pa bunka bwenu?
4 Bifundwa bya Bible bya ku Njibo: I kipite buya kwendeja kifundwa pa bunka bwenu—mu njibo nansha pa kifuko kikwabo. Kino kikakwasha kwifunda kwikale kuyampe ne mwifundi emvwanije Kinenwa kya Leza senene. (Mat. 13:23) Ne kadi kikakwasha mufundiji akwatañanye myanda ifundwa na bisakibwa bya mwifundi. Pakwabo kadi, kwifunda kitatyi kilampe kukakwasha mwa kubandawila Kinenwa kya Leza na mushike ne mu muswelo ukomeja lwitabijo.—Loma 10:17.
5. Le tukokeja namani kutamba ku kifundwa kya pa kibelo ne kusambukila ku kya ku njibo?
5 Le ukabwanya namani kwalamuna kifundwa kya pa kibelo ke kya ku njibo? Shi mubapu kwifunda misunsa kampanda mu kīpi, mwene ukokeja kunena muntu mwifunde’ko kitatyi kilampe pa nsaa mitungwe? Nansha ukokeja padi kushilula na kwipangula kino kipangujo’mba, “Le ukokeja kwikala’ko na kitatyi dyalelo kyotubwanya kushikata ne kwisambila pamo?” nansha amba, “Le dyalelo tukokeja kushikata kyaba kilampe ne kwisambila pa uno mwanda?” Shi tubatunya kutwela ne kushikata, nabya tukendelela bidi na bifundwa bīpi bya pa kibelo. Ebiya pa kitatyi kikwabo kifwaninwe, twatompa monka kusambukila ku kifundwa kya ku njibo.
6. Le i kitungo’ka kyotwingila nakyo mu mwingilo wetu, ne madingi adi mu kino kishinte etukwasha namani tufikile pa kino kitungo?
6 Potwendelela na kukimba boba bafwaninwe, ketwakilwai kitungo kyetu, kine kyotushilwila bifundwa bya Bible ne kyotwendejeja’byo. Kitungo kyetu kinekine i kukwasha ba mityima myoloke bepāne ne kubatyijibwa ke bengidi ba Yehova. Tulomba Yehova etwesele potulonga bukomo mu mwingilo wetu koku tulamine kino kitungo.—2 Tem. 4:5.