Tukimbei Boba Bafwaninwe
1 Musoñanya wa Yesu wa kuvuija mwingilo wa kusapula i mwitupe mwingilo mukomo. Wānene’mba: “Mu bibundi byonso byo mukatwela, shi mu bikatampe, shi mu bityetye, mukasaka monka mwine ufwaninwe biya.” (Mat. 10:11) Dyalelo bantu byobashikata’nka kakitatyi katyetye ku mobo, le i muswelo’ka otubwanya kwibakimba mu muswelo mufike’po?
2 Bandaula Mwaba Obe: Badikila bidi na kubandaula obe mwaba. Le i kitatyi’ka kikalanga bantu bavule ku mobo? Le i kitatyi’ka kyobabwanya kutanwa’ko mu dyuba? Le kudi difuku kampanda dya mu yenga nansha kitatyi kya mu dyuba kyobabwanya kwitabija bupempudi? Kujadika mwingilo obe mungya kibidiji ne ngikadila idi’mo bantu mu wenu mwaba kubwanya kukukwasha umone bipa bipite buya.—1 Kod. 9:23, 26.
3 Basapudi bavule bafikilanga pa kutana bantu ku masaa a kyolwa. Mu kino kitatyi benē mobo bamo papo bekalanga na mutyima mutūke ne na kyaba kya kuteja. Busapudi bwa ku telefone nabo bubwanya kwikala bufike’po. Kwingidila mu mwaba wa busunga ne kusapula mu kifuko kidi bantu bavule i miswelo mikwabo ya kutwadila bantu myanda miyampe.
4 Kipwilo kimo kyakwete mpangiko ya pa bula ya kusapula kyolwa mu mafuku a Dya Mposo ne a Dya Yenga ne kyolwa mu mafuku a Dya Busatu ne a Dya Butano. Kadi bateakenye’ko ne busapudi bwa ku telefone ne bwa mu mwaba wa busunga. Ino mpangiko yakankamikile mpata bonso, ne kipwilo kyatyiba mbila ya kwendeleja’yo.
5 Londalonda’ko na Kusumininwa: Shi mu wenu mwaba i bikomo kutana bantu ku mobo mu kujokela’mo kupya, nabya tompa kushiya kilaeno kipotoloke kya kujokela’ko dipya ponso pofudija bupempudi, kubadila’mo ne bupempudi bubajinji. Kupwa, tentekela kulama kilaeno kyobe. (Mat. 5:37) Shi i byendele’mo, lomba nimelo ya telefone ya mwinē njibo. Kino kikakukwasha mwa kwisambila kadi na muntu’wa.
6 Bukomo bwetu busumininwe bwa kukimba boba bafwaninwe ne bwa kulondalonda kusangela kotutana umbantu kukeselwa na bubine madyese na Yehova.—Nk. 21:5.