Kusapula Bulopwe Kupandijanga Myuya!
1 Uno o mwingilo wa mvubu mpata wingilwa pano pa ntanda mu kino kitatyi. Yehova Leza, Yesu Kidishitu, ne bamwikeulu tununu makumi ne makumi batele mutyima mpata ku uno mwingilo. Ao mwine i mwingilo’ka, ne mwanda waka udi na mvubu? I mwingilo wa kusapula Bulopwe, upandija būmi!—Loma 1:16; 10:13, 14.
2 Bantu bamo balañanga amba tubwanya kukwasha bantu senene shi netu twipāne mu mingilo ya kulumbulula ngikadilo ya bantu netu. Bavule i betumpe mu mingilo ya kukimba ndoe, kundapa mba, nansha kulumbulula tumweno twa bantu. Ino le i kika kikakwasha bantu kutabuka?
3 Mwingilo Mulumbuluke Mpata: Musapu wa Bulopwe ye ao kete ushintulula kine kikadile’ko būmi, kine kisusukila bantu, kadi o upāna lukulupilo lwabine lwimanine pa būmi bwa kumeso. Myanda miyampe ikwashanga bantu bekale balunda na Yehova ne kwibapa “ndoe ya Leza, ya kutabuka ñeni yonso.” (Fid. 4:7) Musapu wa Bulopwe o umo kete upa bantu bwendeji bwa kamweno bwa mwa kunekenenya makambakano a umbūmi bwa dyalelo kadi o ushintulula mwa kukapandila pakonakanibwa ino ntanda imbi. (1 Yoa. 2:17) Mwene buno i bubinga bukatampe botulongela bukomo bwetu bonso bwa kusapula Bulopwe?
4 Tulete kifwa: I kika kiyampe kulonga shi tusaka kukwasha bantu balele tulo mu kibundi mukimba kusabila mema adindilwe na bwando? Lelo tukōpa mema a pene pasaka kutetukila bwando? Nansha tukekwata’ko na kulongolola kibundi kisaka kulobela? Mhm, ketukalongapo namino! I kipite buya kulangula benē kibundi, kwibadyumuna amba kimpengele kyakyo kīya, ne kwibalombola mwa kunyemena! Ne boba balele mu tulo twa ku mushipiditu dyalelo nabo mo monka, badi mu kyaka kikatampe mpata. (Luka 21:34-36) Ino ngikadilo ya bintu byoisa kupita panopano ponka, tulongei buninge bwa kusapwila na kampeja-bukidi bantu bonso botutana!—2 Tem. 4:2; 2 Pet. 3:11, 12.
5 Ūminina’mo: Tukimbei miswelo ya kufikija myanda miyampe ku bantu bavule ba mityima miyampe—ku abo mobo, mu bipito, ku telefone, ne bya kiponka na ponka. Uno mwingilo witupele Yehova o mwingilo wa mvubu mpata otufwaninwe kwingila. Shi twiwingile na bupyasakane, ‘tukepandija batwe bene, ne boba betwivwana bene kumo.’—1 Tem. 4:16.