Sapula na Bupyasakane!
1. Lelo i musoñanya’ka wa Polo otufwaninwe kuta’ko mutyima dyalelo?
1 “Sapula uno mwanda, ne kupyasakana monka.” (2 Tem. 4:2) Mwanda waka uno musoñanya wa Polo udi na mvubu mu ano etu mafuku? Lelo būmi bwetu ne bwa bantu bakwabo butalwa namani na bino binenwa?
2. Mwanda waka tufwaninwe kukimba na bupyasakane boba kebaivwene myanda miyampe?
2 Būmi bwa Bantu Budi mu Kyaka: Midiyo ne midiyo ya bantu pano pa ntanda kebaivwene myanda miyampe ibwanya kwibatūla ku lupandilo. (Loma 10:13-15; 1 Tem. 4:16) Tutananga bantu ba mityima myoloke bavule mu myaba isapulwa’mo kitatyi kivule. Shi tukebapempula mu mafuku palapala ne mu bitatyi bishileshile, tukatana bantu beshileshile. Kukimba bantu na bupyasakane uno muswelo kuketwikadija na mutyima wa mundamunda utōka ne kubingijibwa ku mashi a bantu.—Bil. 20:26.
3. I muswelo’ka otukengidija biyampe kitatyi kyetu mu mwingilo?
3 Bene Kidishitu ba mu myaka katwa kabajinji ‘bāsambakenye Yelusalema yense na kufundija kwabo’ nansha ke mu kupangwapangwa kwa malwa. (Bil. 5:28) Lelo netu twibasumininwe ‘kusapula’ pamo na abo? (Bil. 10:42) Lelo twingidijanga biyampe kitatyi kyetu mu mwingilo? Le tukwatanga mulangwe wa kwisamba na bapityeshinda potwilaija bakwetu balonga kujokela’mo kupya?
4. Lelo kusapula na bupyasakane kuketukwasha namani tuleke kulāla tulo?
4 Twikalei Badyumuke: Byafwena mfulo ya ino ngikadilo ya bintu, tufwaninwe kudyumuka, kulāla tulo mpika. (1 Tes. 5:1-6) Shi tusapula kitatyi ne kitatyi lukulupilo lwetu lwa Bulopwe, ketukalēmenenwapo na ino ngikadilo ya bintu. (Luka 21:34-36) Pakwabo kadi, ‘potusakidila byamalwa’ difuku dya Yehova, tukapyasakena mu mwingilo upandija būmi.—2 Pet. 3:11, 12.
5. Le kulēmeka būmi kwitukankamikanga namani tusapule?
5 Kitatyi kyotusapula na bupyasakane tulombolanga’mba tumwene būmi na mwibumwena Yehova: “Kasakilepo’mba, nansha umo ōneke, mhm, poso’mba, bonsololo bafikile pa kwalamuka pa mutyima.” (2 Pet. 3:9; Ezek. 33:11) Nanshi twendelelei kufikila bantu bavule mu mwaba wetu, mwanda wa kutendela Yehova!—Mit. 109:30.