Kutundailwa kwa Kashā!

¹ Bisaka bya bene Kidishitu bya pi na pi bilombolanga nsangaji ya kufwija’ko yobimvwananga pa kupwa kubandila bande wa video Les jeunes s’interrogent. . . Comment se faire de vrais amis ? Shabana umo wa mu États-Unis wanene amba, pobapwile kutala’ye, bandi bana bonso bakunkamene’po nkū​—bine, basangedile byonso bidi mu uno bande wa video! Lapolo umo wa mu Malawi unena amba batutu ne bakaka bankasampe ba mwine’mwa nabo i basangele’ye, mwanda kuningilwa kobaningilwanga na bakwabo ku masomo i kumo konka. Shabana umo wa mu Alemanye wanene pa uno bande wa video amba: “Monanga’ye bu malondololo ku milombelo yami.” Nkasampe umo nandi amba: “Mwafwai’ko ne kumvuluja amba Yehova untele mutyima.” Mukulumpe umo wa mu Nuvele Zelande wasekunwine amba uno bande wa video “wakweshe nsongwakaji umo mu bansongwakaji betu, wajokela mu dishinda dya būmi.” Nsongwakaji umo musongwe watadile’ye, wanena’mba: “Bine, ngabila bininge nkasampe ye-yense udi mu bubinebine atale uno bande wa video, atononwe kukwata bubinebine makasa abidi!” A bisaka, lelo mwabulwa’po kutala’ye dikwabo! Kupwa, mwisambile pamo pa bino bipangujo bilonda’ko.

² Ntwelelo: Mulunda wabine i mulunda wa namani?​—Nk. 18:24.

³ Bijika Bikalakanyanga Bulunda: I muswelo’ka okokeja kwipwa milangwe ya kwimona bu mwelwe? (Fid. 2:4) Mwanda waka ufwaninwe kusangela kulumbulula bumuntu bobe, ne i ani ukokeja kukukwasha pa kino? I kika kikakushitwila mikenga ya kwikala na balunda bavule, ne i kwepi kobabwanya kutanwa?​—2 Kod. 6:13.

⁴ Bulunda na Leza: Le ukokeja namani kuningisha bulunda na Yehova, ne i kika kinenenwa amba i kintu kifwaninwe kulongela bukomo? (Mit. 34:8) I ani ukokeja kuningisha bulunda bobe na Leza biyampe kutabuka?

⁵ Balunda Babi: Bapwani babi i bapwani ba muswelo’ka? (1 Kod. 15:33) Le balunda babi bakokeja namani kufikija muntu ku kufwa ku mushipiditu? Mānga ya Dina itanwa mu Bible ikufundija bika?​—Ngal. 34:​1, 2, 7, 19.

⁶ Kya Malwa kya mu ano Mafuku: Tara watengelwe namani na bushiyena? Wadi ukimba kwibingija namani pa kisense kyandi na bankasampe ba ino ntanda? Bamutūdile mu byaka’ka? Mwanda waka bambutwile bandi babudilwe kumona kyaka kyaadi’mo, ino i na mutyima wa namani obamukweshe nao wealuja biyampe ku mushipiditu? Le kaka umo pania welombwele muswelo’ka bu mulunda wabine wa Tara? Mwanda waka bene Kidishitu bafwaninwe kulonda munenena Nkindi 13:20 ne Yelemia 17:9? Tara waboile’po ñeni’ka mu būmi bwandi?

⁷ Mvuyo: I ñeni’ka yowaboila ku uno bande wa video? Nobe ukokeja namani kukwasha nandi bantu bakwabo?​—Mit. 71:17.