Kukusa Nkunwa Mingimingi Kuletanga Madyese Mavulevule
1 Batwe bonso tutengele kufikidila kwa milao milēme ya mu Kinenwa kya Leza. Nansha ke pano, Yehova witweselanga madyese mavule abwejanga nsangaji ku būmi bwetu. Bungi bwa byabuyabuya byotumwena’mo bulondanga nakampata mungya bukomo botulonga. I amo, “yewa wakukusa mingimingi. . . ukāngulanga yonka mingimingi” pamo’nka na mwānenene’kyo mutumibwa Polo. (2 Kod. 9:6) Tubandaulei mu bintu bibidi motukokeja kwingidija uno musoñanya.
2 Mu Mwingilo Wetu: Kusapula myanda miyampe ku bantu bakwabo shi tudi na mukenga wa kwibasapwila kuletanga mpalo mivule. (Nk. 3:27, 28) I kya kutendelwa, mwanda bavule bakunanga bingibingi na kutandabwila’ko mwingilo wabo, kifwa na kwingila bu pania mukwashi nansha bu pania walonso. Batwe bonso tubwanya kukuna bingibingi shi tudi na kibidiji kya kujoka na mutyima onso kukatamija kwabila kwa boba basangela musapu ne kwibanena kwifunda nabo Bible popa ponso pamweka mukenga. (Loma 12:11) Kuputumina mu mingilo mu ino miswelo kulupulanga bipa bikankamika kadi kwituletela ne nsangaji mu mwingilo wetu.
3 Tukwatakanyei Tumweno twa Bulopwe: Polo wādi wisambila pa ‘kukusa nkunwa mingimingi’ na kupāna bintu bya ku ngitu. (2 Kod. 9:6, 7, 11, 13) Dyalelo, kudi miswelo mivule yotukokeja kukwatakanya nayo tumweno twa Bulopwe na bintu bya ku ngitu nansha na bukomo bwetu. Tukokeja kukwasha ku lūbako lwa Mobo a Bulopwe. Tukokeja nansha kwituma batwe bene kukakomba ne kukalongolola bino bifuko bya butōtyi bwabine. Kadi, tukokeja kutūla bya buntu bya lupeto bya kukwatakanya nabyo mingilo ya kipwilo ne mwingilo wa Bulopwe wa kusapula ne kulonga bana-babwanga wingilwa ntanda yonso. Wivwane batwe bonso twingile’mo wa kyandi wa kyandi, tukasangala mpata pa kumona madyese a ntanda ne ntanda aketwesela Yehova mu uno mwingilo otupelwe na Leza!—Mal. 3:10; Luka 6:38.
4 Kinenwa kya Leza kitusoñanya ‘kulonga biyampe senene, ne kwikala bampeta mu mingilo milumbuluke, ba mutyima wa kupyasakena mu kupāna.’ Shi tulonde ano madingi, tukeselwa madyese mavule tamba’nka pano. Kadi monka, ‘tukebikila bupeta bwa ku mwaka ukāya’ko bu kyalwilo ne būmi bulumbuluke’ bukāya’ko.—1 Tem. 6:18, 19.