Ikalai na “Mutyima wa Kupyasakana mu Kupana”

¹ Myaka tutwa kunyuma, mutumibwa Polo wāsoñenye Temote kukankamika banababo betabije amba “balonge biyampe, senene, kadi bēkale bampeta ba mu mīngilo milumbuluke, ne mutyima wa kupyasakana mu kupana, ne mu kukwasha bakwabo bonso.” (1 Tem. 6:18) Polo yenka wāvuluja ne bene Kidishitu Bahebelu amba kebakīlwa “kulonga biyampe ne kupana byakupana [ku bakwabo].” (Bah. 13:16) Mwanda waka wāsonekele ino misoñanya? Mwanda wādi uyukile amba “bonso boba balonga biyampe bakapebwa ntumbo ne buleme, ne ndoe.”​—⁠Loma 2:10.

² Yehova Leza ye Mwinē bintu byonso, mwanda ye Aye wāpangile’byo. (Kus. 4:11) Tutendelanga mpata biyampe byonso byaitulongelanga na bintu byandi. Nansha bantu bavule byobadi na mwikadilo wakubulwa kufwija’ko, aye’ko, Mwine Mukatakata Mwine, wendelelanga na kupa bantu bonso muswelo wa kumwena biyampe mu bintu bivule byaloñanga mwanda wa kukwatakanya būmi bwabo. (Mat. 5:45) Wāikele ne kupāna bu kitapwa wandi Mwana waswile mpata amba tukamwene’ko būmi bwa nyeke. Lelo buno buswe bwaētulombwele bubulwe’po kwitutonona netu tumufwije’ko na kwikala na mutyima wa kupyasakena mu kupāna ku bantu netu?​—⁠2 Kod. 5:​14, 15.

³ Lelo I Bintu’ka Byotukokeja Kupāna? I kyendele’mo kwingidija byabupeta byetu byo-byonso byotudi nabyo mu muswelo usangaja mutyima wa Leza. Bine tufwaninwe kukwatakanya na bintu bya ku ngitu ne bya ku mushipiditu mwingilo wa Bulopwe wingilwa ntanda yonso. I amo, myanda miyampe kyo kyabulēme kya mvubu kutabuka bintu byo-byonso bikokeja kwikalwa nabyo, mwanda i “bukomo bwa Leza bwa lupandilo.” (Loma 1:16) Shi tupāna kyetu kitatyi ne byabupeta byetu, tutambila kweji ne kweji mu mwingilo wa kusapula ne kufundija, tukekala na kyaba kya kupa bakwabo kino kyabulēme kya ku mushipiditu, kikebafikija ku būmi bwa nyeke.

⁴ Yehova usepelelanga mpata potukwashanga boba bafudilwe. I mulaye kuketwesela madyese, kadi wituvuluja’ko amba: “Byabupeta kebidipo ne kamweno mu difuku dya bukalabale: Ino boloke bunyongolola ku lufu.” (Nk. 11:4; 19:17) Nanshi tukwatakanyei mwingilo wa Bulopwe na bintu bya ku ngitu ne na kusapula bininge, ino yo miswelo milumbuluke mpata ya kulombola amba binebine tudi na mutyima wa kupyasakena mu kupāna pakubulwa nsengwa.