Tulongei Biyampe ne Kupāna’byo ku Bakwetu
1 Dokasa “wadi muyūlwe munda mwandi mīngilo miyampe, ne byabuntu.” (Bil. 9:36, 39) Buntu bwandi bwāmufikije ku kuswebwa na boba bamuyukile ne na Yehova Leza mwine kumo. Bahebelu 13:16 unena’mba: “Kulonga biyampe ne kupana byakupana kemukivulaminwapo, mwanda aye Leza uloelelwe bitapwa bidi namino.” Le dyalelo tukalongela bakwetu biyampe namani?
2 Muswelo umo bidi umwena’mo bakwetu i na kwibapa “bintu” byetu bya mvubu. (Nk. 3:9) Byabuntu byotutūla pangala pa mwingilo wa ntanda yonso bikwashanga ku lūbako lwa Mobo a Bulopwe, Mobo a Kubungakena’mo ne mobo a misambo kujokoloka ntanda yonso. Nanshi buntu bwetu bukwashanga midiyo ne midiyo ya bantu bamwene mu bufundiji bwa kiteokratike ne mu kisense kyūbaka kya ku mushipiditu.
3 Pāna Busengi: Shi kubaikala kimpengele, bantu ba Yehova beteakenye ‘kulonga biyampe’ ku banababo betabije enka ne ku boba bampikwa kwitabija bene kumo. (Ngat. 6:10) Kinondanonda na kusabika kwa mobo a tshapu imo mu Franse, ba mulume ne mukaji badi bekele kubwipi na tshapu’ya banene amba: “Banabetu bene Kidishitu baile lubilo lonka kwitukwasha ne kukolopa byumba byonso’nka ne bya bantu bakwabo botwikalanga nabo ku njibo bene. Balondakani batulumukile mpata pa kumona bantu bavule betukwasha’ko.” Kaka mukwabo ubweja’ko amba: “Bakulumpe betukweshe’ko. Badi betukankamika. Bine, kyo kintu kyotwadi tusaka, kutabuka’nka ne bintu bine bya ku ngitu.”
4 Eyo, kudi miswelo mivule ya kulongela bakwetu biyampe, ino muswelo umo wa kamweno i kwibasapwila buyuki bulēme bwa bubinebine, mutanwa ne lukulupilo lwa “būmi bwa nyeke” bulaile Yehova aye mwine. (Tet. 1:1, 2) Musapu wa mu Bible upānanga busengi ku boba badila pangala pa ngikadilo ya ntanda ne pa mwikadilo wabo wa bubi. (Mat. 5:4) Bine, tulongei biyampe ne kupa’byo bakwetu dikasa dyetu podikikokeja kulonga’byo.— Nk. 3:27.