Endelelai Kwitamija Banwe Bene na Bene
1 Mutumibwa Polo wālongele mwandi monso mwanda wa kukomeja banababo betabije. (Bil 14:19-22) Netu tutanga banabetu mutyima shi abatanwa mu bikoleja, ne tudi na mutyima wa kwibakwasha. Bible ulombola amba bonso, ke enkapo bakulumpe kete, bafwaninwe kuta mutyima ku bakwabo. (Loma 15:1, 2) Ivwana’tu bidi miswelo ibidi yotukokeja kulonda’mo ano madingi a buswe a amba: “Mwikankamikei bānwe bene na bene, ne kwitamija bānwe bene.”—1 Tes. 5:11.
2 Nañuna Bisakibwa bya Bakwenu: Kinenwa kya Leza kisekununa amba Dokasa “wadi muyūle munda mwandi mīngilo miyampe, ne byabuntu kudi balanda.” (Bil. 9:36, 39) Wādi ujingulula boba badi bafudile ne kulonga’po kintu kya kwibakwasha. Bine, i kimfwa kiyampe kyaāshidile batwe bonso! Padi ubaivwana amba mununu kampanda ubudilwe wa kumuleta ku kupwila. Nansha amba kudi pania ubudilwe wa kusapula nandi mu difuku kamukaya kyolwa. Shi unañuna bino bisakibwa ne kuleta’po bukwashi busakilwa nabya langa’po mukakankamikilwa okakwasha’wa!
3 Mīsambo ya ku Mushipiditu: Tukokeja kadi kutamija bakwetu na misambo. (Ef. 4:29) Mukulumpe umo wa bwino unena’mba: “Shi usaka kukankamika bakwenu, nabya wisambile pa bintu bya ku mushipiditu. Shi usaka kushilula mīsambo yūbaka, ukokeja kwipangula’tu kipangujo, kimfwa amba: ‘Le wayukile bubinebine namani?’” Ta mutyima ku bansongwa ba mu kipwilo. Langila boba batyumukwe mityima ne boba ba bumvu. (Nk. 12:25) Kokaleka myanda itala bya mazua bya ino ntanda bitādila mīsambo ya ku mushipiditu yomwisamba na banabenu betabije.—Loma 1:11, 12.
4 Penepa i bika byokanena mwanda wa kutamija bakwenu? Mu butangi nansha kwifunda kobe kwa kasuku, le watene’mo panopano musoñanya ukutonona uswe ne kufwija’ko Yehova? Le kudi kintu kya kutengele mu dishikulu dya bantu bonso dyowaivwene nansha mu Kifundwa kya Kiteba kya Mulami? Pakwabo padi watendele mwanda mumweke ukomeja lwitabijo? Shi udi na bino bya bulēme bya ku mushipiditu, nabya kukabulwepo kintu kya kukankamika nakyo bakwenu.—Nk. 2:1; Luka 6:45.
5 Shi tukwasha banabetu nansha kwingidija ludimi lwetu na tunangu, nabya tukendelela kwitamija batwe bene na bene.—Nk. 12:18.