Kwikankamika Umo ku Mukwabo mu Mwingilo
1 Batwe bonso tukankamikwanga na “kinenwa kinenwa pafwaninwe.” (Nk. 25:11) Potwingila na bakwetu mu mwingilo, tukakulupila namani amba binenwa byetu bikankamikanga?
2 Mīsambo Ikankamika: Bine kwisamba myanda ya ku mushipiditu potudi mu busapudi i kintu kikankamika’po kashā! (Mit. 37:30) Tukokeja kwisambila pa busapudi nansha pa mwanda ukankamika otwemwenine mu mwingilo wa budimi. (Bil. 15:3) Lelo twasokwele myanda ikankamika mu butangi bwetu bwa Bible, mu mapepala, nansha ku kupwila? Kadi tukokeja kwisambila pa myanda yotwaimvwene panopano mu dishikulu ku Njibo ya Bulopwe.
3 Tukokeja padi kutyumukwa mutyima shi mwisambi netu wanena mwanda wetukankaja kwendeleja mīsambo. Kumeso kwa kufunduka kwinjibo, i biyampe kusela’ko minite mityetye kubandaula na mwingidi netu muswelo otubwanya kulondolola kipangujo kitwipangwilwe, padi na kukatala mu kabuku Kushilula ne Kwendeleja Misambo. Shi tubamone amba musapwilo wa yewa otusapula nandi i muyampe, tubwanya kumufwija’ko na binenwa bikankamika.
4 Alwila’ko: Lelo kudi’ko umo mu kyetu kisumpi kya kifundwa kya kitabo otwaija kwampikwa kwingila nandi? Kulaija mwanetu umo aketushindikile mu mwingilo, i kimo kya mu “kwikankamika kwa bātwe bonso.” (Loma 1:12) Bapania ba lonso ne bakwashi bakasangela kwingila netu pamo, nakampata lubanga nansha kyolwa kitatyi kekitambilangapo basapudi bavule mu mwingilo. Tukakwatakanya bapania shi twitabija kusapula nabo. Lelo kudi musapudi kakisapulangapo mwaadi usapwila mwanda wa misongosongo? Kukwata’ko mpangiko ya kukendeja nandi kifundwa kya Bible kukokeja kwimukwasha.—Nk. 27:17.
5 Kufwija’ko muntu ne kumutendela enka ne mu bintu bityetye, kyaba kivule kukankamikanga. Tufwaninwe kutūla kino mu ñeni kitatyi kyotusapula, mwanda tusakanga ‘kwikankamika batwe bene na bene.’—1 Tes. 5:11.