Ikala Mukwashi Mulumbuluke mu Busapudi
1. I kamweno’ka kadi mu kusapula pamo na mwanetu?
1 Difuku dimo, Yesu wātumine bana ba bwanga 70 mu busapudi, “kadi webatalwile babidi babidi.” (Luka 10:1) Pambulwa ne kutatana kwine, ino mpangiko yālengeje bandi bana ba bwanga bekwashe ne kwikankamika abo bene na bene pobādi basapula. Lelo tukokeja namani kukwasha mwanetu otusapula nandi?
2. Mwanda waka tufwaninwe kuteja pasapula mwingidi netu, ne tukateja namani?
2 Na Kuteja: Teja na katentekeji pasapula mwingidi nobe. (Yak. 1:19) Londa mu Bible obe patangwa kisonekwa. Tala mwine wisamba, ekale i osapula nandi nansha omusapwila. Shi ute mutyima ku mīsambo, nankyo ukakankamika omusapwila nandi ate’ko mutyima.
3. I kitatyi’ka kikasangela mwingidi netu tunene’po?
3 Na Kuyuka Kitatyi kya Kunena’po: Kitatyi kyotudi na mwanetu usapula, tukamupa bulēme na kumuleka endeje mīsambo. (Loma 12:10) Tufwaninwe kwepuka kumutyampa pa ludimi. Shi wailwa bya kunena nansha shi omusapwila walupula mwanda nansha kipangujo, ne omusapula nandi walombe bukwashi, tukalonga buninge bwa kubweja milangwe pa byadi binena mwingidi netu pa kyaba kya kutweja’mo mwanda ungi. (Nk. 16:23; Mus. 3:1, 7) Potwisamba, binenwa byetu bifwaninwe kukwatañana na bukamoni busapulwa.—1 Kod. 14:8.
4. Lelo i bika bikalengeja tusepelele ne kusangala mu mwingilo?
4 Bana ba bwanga 70 pa kupwa kusapula, ‘bajokele basepelele.’ (Luka 10:17) Netu tukasepelela ne kusangala mu mwingilo potuteja ne kuyuka kitatyi kya kunena pa kukwasha boba botusapula nabo.