Kokikala Talala Pomusapula na Mukwenu
1. Lelo kitatyi kyotusapula na basapudi bakwabo, tubwanya kwiula mutumibwa Polo namani?
1 Mutumibwa Polo, ponso paādi witana na banababo mu lwitabijo wādi umona bu i mikenga ya “kwikankamika.” (Loma 1:12) Kitatyi kyomusapula na musapudi mukwabo, le umonanga kino kitatyi bu kya kumukankamika ne kumukwasha? Pa kyaba kya kwikala talala, mwene i biyampe kumulombola bikukwashanga wikale musapudi upa bipa?
2. Le i bika byotubwanya kulonga mwanda wa kukankamika muntu otusapula nandi ekulupile, kadi mwanda waka kidi na mvubu?
2 Mukwashe Ekulupile: Basapudi bamo babulwanga kwikulupila abo bene, kino kimwekelanga ku mpala ne ku diwi dyabo. Tukokeja kwibakankamika bekulupile abo bene na kwibafwija’ko na mutyima umo. Le i miswelo’ka mikwabo ya kukwasha muntu ekulupile? Mutadi umo wendakana kekakilepo kulombola muntu waāsapwile nandi mwaadi aye mwine na moyo ne muswelo waadi ulombela divule dine mwanda wa kukomena moyo wandi. Tutu mukwabo nandi ulombola byamukweshe ekale kwikulupila, unena amba: “Nshilulanga bidi na kumungamunga. Kyaba kikwabo nombelanga Leza ankwashe ngikale mpelelwa kwisamba.” Lelo nobe kudi kintu kampanda kyakukweshe wikale kwikulupila mu busapudi? Nabya sekunwina’kyo mukwenu omusapula nandi.
3. Le i muswelo’ka otukokeja kukwasha muntu otusapula nandi ekale musapudi muyampe?
3 Musapwile Manwa: Le kudi muneneno kampanda nansha kipangujo kipēla, padi kisambila pa kinkumenkume kya kwenu, kyomona’mba kikokeja kukwasha pa kushilula mīsambo? Le kodi mwimwene bipa biyampe na kubweja manwa kampanda a abe mwine ku musapwilo wa kulondela’po? Nankyo lombola’o mukwenu. (Nki. 27:17) Kitatyi kyomwenda kukapempula muntu, ukokeja kulombola mukwenu kitungo kine kyomukamupempwila ne muswelo obikapita. Pa kupwa kwendeja kifundwa kya Bible, mushintulwile kine kyo wadi utongedile mwanda kampanda, kisonekwa, nansha manwa a mwa kufundijija mwanda wa kulondolola ku bisakibwa bya mwifundi.
4. Mwanda waka tufwaninwe kuta mutyima wa kukwasha basapudi bakwetu?
4 Basapudi ba mu myaka katwa kabajinji kebādipo basangela enka kukwasha bampikwa kwitabija kete. Bādi kadi bayukile kamweno ka kwikankamika ne kwikomeja abo bene na bene. (Bil. 11:23; 15:32) Mutumibwa Polo wāfundije nkasampe Temote ne kumukankamika alombole bantu bakwabo byobya byaāfundile. (2 Tm. 2:2) Shi ketuvulaminwapo kulongela banabetu bene Kidishitu biyampe mu mwingilo, nabya tukebakwasha bekale na nsangaji ne manwa, ne kadi tukasangaja Tata wetu wa mūlu.—Bah. 13:15, 16.