Malondololo ku Bipangujo Byenu

◼ I bika byotufwaninwe kuta’ko mutyima potwingidija matelesele ne bikolo byetu biselwa ku makasa?

Bino bingidilwa bitukwashanga pa kwisamba na bakwetu mu kifuko kyo-kyonso motutanwa. Eyo, bino bikolo bitukwasha shabyo, ino tufwaninwe kutadija senene mwanda ketufwaninwepo kwingidija ano matelesele ne bikolo biselwa ku makasa pa kitatyi kekifwaninwe, kutyina amba twakalabika bantu mu mwingilo wetu nansha ku kupwila kwa bwine Kidishitu. Lelo bino bikokeja kukoleja namani?

Langa’po bidi shi kitatyi kyotupāna bukamoni mu mwingilo wa busapudi, amba twivwane telesele nansha kikolo kyetu kibadila. Lelo mwinē njibo ukalanga’po namani? Lelo tukamweka namani ku meso andi shi tubaleka kulondolola? Ketusakilepo kukalakanya bakwetu kitatyi kyobevwana musapu wa Bulopwe. (2 Kod. 6:3) Nanshi, shi tuselele telesele nansha kikolo kampanda, tufwaninwe kubula’kyo kutyina amba kyakavutakanya mwingilo wetu wa budimi nansha wa bakwetu.

Ino tukalonga namani shi batwe bo bakungila bitupu, ino bakwetu bo bapāna bukamoni? Shi tubetūdila’ko kitatyi kampanda amba i kya mwingilo wa busapudi, mwene i biyampe kuta ne mutyima wetu mwine ku uno mwingilo? Bine, tupei mwingilo wetu ukola bulēme na kwingila mingilo yetu ne kukimba tumweno twa batwe bene kitatyi kikwabo. (Loma 12:7) Ino ke kunenapo amba ketukengidija’po telefone shi tusaka kusapula nayo nansha kwipa kilayeno na bantu ba kukasapwila.

Tufwaninwe nakampata kudyumuka kwingidija matelesele kitatyi kyotwendeja motoka, mwanda bukimbi bumo bwa myanda ilongeka bulombola amba kwingidija matelesele mu dishinda ke’ko kuvudija byaka. Tufwaninwe kulonda bijila bipeleja kwingidija matelesele kitatyi kyotwendeja motoka.

Kyotukataninwanga ku kupwila kwa pa kipwilo, ku kubungakana, ne ku bitango i kutōta Yehova ne kufundijibwa na aye. Mwene mutyima wetu wa kufwija’ko pangala pa buujila bwa bino bitatyi uketutonona kubula matelesele ne bikolo byetu bya ku makasa kutyina kwilabika batwe bene nansha kulabika bakwetu? Shi kudi mwanda wa kampeja-bukidi ufwaninwe kulondolola, nankyo i biyampe kwingidija bikolo panja pa kifuko kyotupwidila’mo. Shi bitupu, kikekala kiyampe kulonga bintu bitutala batwe bene ne bya twaji twetu kitatyi kikwabo kupita’ko kwibilonga pa kitatyi kitūdīlwe kupwila.​—1 Kod. 10:24.

Tusaka muswelo otwingidija matelesele nansha bikolo bikwabo ulombole nyeke amba tubangile bakwetu ne amba tukwete bintu bya ku mushipiditu na mutyika mukatampe.