Malondololo ku Bipangujo Byenu

◼ I misoñanya’ka ya mu Bible itukwasha mwa kwingidijija matelefone kitatyi kyotudi ku kupwila kwa bwine Kidishitu ne mu busapudi?

“Bintu Byonsololo’tu Bidi . . . ne Kitatyi.” (Mus. 3:1): Matelefone akwashanga bantu kwitumina misapu ne kwisamba na bakwabo kubwipi kwa nsá yonso. Ino, mu bitatyi bimo bene Kidishitu ke bafwaninwepo kulabikwa na matelefone abo. Kimfwa, kupwila kwetu i kitatyi kya kutōta Yehova, kutambula bufundiji bwa ku mushipiditu, ne kwikankamika batwe bene. (Kup. 31:12; Mit. 22:22; Loma 1:11, 12) Mwene i biyampe kufunga’yo kitatyi kyotufika ku kupwila ne kutala misapu’nka shi tubatambe? Shi kudi mwanda wa bukidibukidi ulomba kushiya telefone yetu pululu, tufwaninwe kwiitūla mu ngikadilo yokeikokejapo kupuakanya bakwabo.

‘Longela Bintu Byonso pa Mwanda wa Myanda-Miyampe.’ (1 Kod. 9:23): Mu bitatyi bimo, i biyampe kwingidija telefone mu mwingilo. Kimfwa, tutu mwimaniji ukokeja kwiingidija mwanda wa kwipangula boba bakasapwile mu bipindi bikwabo bya mu mwaba. Basapudi nabo mu bitatyi bimo bengidijanga telefone mwanda wa kwita bantu basepelele nansha baefundanga nabo Bible kumeso kwa kukebapempula, nakampata shi muntu ushikatanga kulampe. Shi tudi na telefone, tufwaninwe kuta’ko mutyima kutyina amba yakakalakanya mīsambo na mwinē njibo. (2 Kod. 6:3) Kitatyi kyotwilaija basapudi bakwabo, pa kyaba kya kwitañana ku telefone nansha kutumina bakwetu misapu, mwene’mba i biyampe kuta mutyima wetu ku mwingilo ne bakwetu botusapula nabo?

Yuka Kubanga Bakwabo. (1 Kod. 10:24; Fid. 2:4): Ke biyampepo kutyelewa ku kupwila kwa kwenda mu busapudi na mulangwe wa kunena’mba nyeke ngitanga muntu, nansha kutuma musapu nayuka kala kisumpi kyetu kokikasapwila. Shi tubafika kitatyi ke kipite, pavule ke bilombe kupangulula monka kisumpi. Shako ngikadilo imo yampikwa kulaya ikokeja kwitutyeleweja kyaba kimo. Ino shi twikale na kibidiji kya kufika kumeso kwa kitatyi tukalombola’mba tulēmekele mpangiko ya Yehova, tutu mwine wimanine ino mpangiko, ne basapudi bakwetu.