Twikalei Babambakanibwe Pamo Biyampe
1 I misunsa inga yokodi mutendele bwino bupungilwe nabo umbidi wa muntu? (Mit. 139:14) Kipindi ne kipindi kya ku umbidi kingidilanga pamo na bipindi bikwabo. Kinenwa kya Leza kidingakanyanga kipwilo kya bwine Kidishitu na umbidi udi mu ndudi senene. Bonso badi pa kipwilo badi munshi mwa Mutwe wabo Kidishitu, kasha ‘babambakanibwa pamo biyampe ku bilungwalungwa byonso.’ (Ef. 4:16a) Nanshi Yehova ukokeja kwingidija bantu bandi bekutyile umbumo mwanda wa bavuije mingilo yandi ya kutendelwa.
2 Banabetu ba mu kipwilo kya mu myaka katwa kabajinji bādi na “mutyima wabo umo,” bēta mutyima mu bisakibwa bya ku mushipiditu ne bya ku ngitu. (Bil. 2:44-47) Abo bonso bādi batanwa na kulondwalondwa kwa mwiko, ino na bukwashi bwa Yehova, bādi banekenya’ko. (Bil. 4:24-31) Bādi basapula musapu wa Bulopwe konso kobādi benda, basambakanya myanda miyampe pa ntanda yonso yādi iyukene mu abo mafuku’a. (Kol. 1:23) Dyalelo, kipwilo kya bwine Kidishitu nakyo kiloñanga bino bintu bimo byonka mu ludingo lukatampe kutabuka. I bintu’ka bibalengeje bekale mu bumo?
3 Balungwe Umbumo na Bufundiji bwa Leza: Tulungilwe mu bumo na butōtyi bwetu kujokoloka ntanda yonso. Le bino i bibwanike namani? Twi betabije kingidilwa kimweka na meso kitupela’mo Yehova “bidibwa pa kitatyi kifwaninwe.” (Mat. 24:45, NW) Kadi tukwete na mutyika ‘bantu bu byabuntu’ batūdilwe bu bafundiji mu kipwilo. Kwitabija kotwitabija na kwityepeja mpangiko itūdile’ko Yehova ya kwitudisha ku mushipiditu, kutamijanga kwimvwanija kwetu kwa Kinenwa kya Leza ne kadi kwitutononanga twikale na mutyima wa kwiula Yesu mwanda twi bandi bana-babwanga. Tufwaninwe kwendelela na kwifunda Kinenwa kya Leza, koku twikankila’ko ‘kufikila batwe bonso pa bumo bwa lwitabijo.’ (Ef. 4:8, 11-13) Lelo nobe uluñanga kuboko ku bumo bwetu bwa ku mushipiditu na kutanga Bible difuku ne difuku?
4 Balungwe Umbumo na Kisense kya Bwine Kidishitu: Buswe bwitukongakenyanga pamo mu kisense kiyampe kitatyi kyotutanwa ku kupwila kwa bwine Kidishitu. Ku kuno kupwila, ‘twitanga mityima batwe bene na bene.’ (Bah. 10:24, 25) Kwita mutyima i ne kuyukidija banabetu biyampe, ke enkapo kwibamona mobamwekela ku meso bitupu, ehe, ino i kwibamona bu balēme mwibamwena Yehova. (Hak. 2:7) Potwimvwana binenwa byabo bya lwitabijo, buswe botwibaswele bubwejanga’ko mushike, ne bumo bwetu nabo bwaninga. Lelo bonso bakuyukile bu muntu utanwanga ku kupwila konso kwa pa kipwilo?
5 Bengidi Netu mu Mwingilo wa Budimi: Kusapula myanda miyampe na banabetu mu lwitabijo kwitukutyilanga umbumo potulonga kiswa-mutyima kya Leza. Mutumibwa Polo wādi ukwete na mutyika ‘bengidi nandi ba mu mingilo ya bulopwe bwa Leza.’ (Kol. 4:11) Kwisekunwina myanda ne kwikwasha na banabetu mu busapudi kwitupanga muswelo wa kwingila mwingilo wetu wa bwine Kidishitu ne kuningisha kijimba kyetu kya bumo.—Kol. 3:14.
6 Bukomo bwa Mushipiditu Bwitukutyilanga Umbumo: Yehova witupanga wandi mushipiditu ponso potwielela’ko kulonga kiswa-mutyima kyandi. Kino kitupanga muswelo wa kupwija tumyanda tutyetutye ne kwikala umbumo. (Mit. 133:1) Kitutonona twikale ‘kulama bumo bwa mushipiditu monka mu kijimba kya ndoe.’ (Ef. 4:3) Umo ne umo ukokeja kutuntwila ku bumo budi mu bantu ba Leza na kulombola bipa bya mushipiditu mu bintu byotwilongela batwe bene na bene.—Ngat. 5:22, 23.
7 Kwingidila umbumo munshi mwa mutwe wetu Kidishitu ‘kubaijanga ngitu ne kwiitamija ayo mine monka mu buswe.’ (Ef. 4:16b) Kupityidila, kutumbijanga Yehova “Leza uleta ndoe.”—Loma 16:20, MB.