‘Lama Bumo bwa Mushipiditu’
Mutumibwa Polo wākankamikile bene Kidishitu ba mu Efisesa amba, endelelai “[kwitūkijija] mutyima na buswe banwe bene na bene, mwielela’ko bya binebine kulama bumo bwa mushipiditu mu kijimba kya ndoe kilungila pamo.”—Ef. 4:2, 3.
“Bumo” bwetu botusangelanga buletwanga na “mushipiditu.” Kino kishintulula’mba buno bumo buletwanga na bukomo bwa Leza. Inoko monka mwānenene’kyo Polo, tufwaninwe kulama bumo bwetu. Le i bāni bafwaninwe kwibulama? Na bubine, mwine Kidishitu yense ufwaninwe kulonga bukomo bwa “kulama bumo bwa mushipiditu.”
Kimfwa, fwatakanya’po muntu kampanda wakupe motoka mupya. Le i ani udi na kiselwa kya kwiulama senene? Malondololo adi patōka. Shi motoka ubaoneka mwanda kwiukwatakanyangapo biyampe, kubwanyapo kutopeka mwine wakupele’o.
Muswelo umo onka, nansha shi bumo bwetu i kyabuntu kitupele Yehova, umo ne umo motudi udi na kiselwa kya kwibulama. Shi ketudipo mu kipwano kya ndoe na tutu nansha kaka, tunenwe kwiipangula’mba, ‘Le noñanga bukomo bwami mwanda wa kulama bumo bwa mushipiditu na kuvuija myanda?’
‘MWIELELEI’KO BYA BINEBINE’ KULAMA BUMO
Monka mwālobwedile’kyo Polo, kitatyi kimo biketulomba kulonga bukomo bwa kulama bumo bwa mushipiditu. Kadi tufwaninwe kulonga uno muswelo kutabukidila shi tutu nansha kaka wetusanshija. Le pa kulama bumo, bilomba’nka kukamona muntu witusanshije ne kukesambila nandi pa mwine mwanda’wa? Aa. Nanshi wiipangule amba, ‘Le kwisambila pa kuno kwisusa, kukaleta bumo’ni nansha kukabipijija’ko myanda?’ Kitatyi kimo i biyampe’tu kusūla kilubo nansha kulekela.—Nki. 19:11; Mako 11:25.
Wiipangule amba, ‘Le kwisambila pa kuno kwisusa, kukaleta bumo’ni nansha kukabipijija’ko myanda?’
Monka mwālembele’kyo mutumibwa Polo, lekai twendelele kwitūkijija “mutyima na buswe [batwe] bene na bene.” (Ef. 4:2) Dibuku dimo dinena’mba, uno musemwa ubwanya kwalamunwa ne amba “mwibatambulei monka mobekadile.” Kino kishintulula’mba tunenwe kwitabija’mba banabetu mu lwitabijo baloñanga bilubo pamo bwa batwe. Na bubine tuloñanga bukomo bwa “kuvwala bumuntu bupya.” (Ef. 4:23, 24) Inoko i kutupu muntu nansha umo motudi ubwanya kulonga namino mu muswelo mubwaninine. (Loma 3:23) Shi twitabije amba twi ba kubulwa kubwaninina, tukapelelwa kwitūkijija mutyima batwe bene na bene, ne kwilekela. Mu uno muswelo, tukalama “bumo bwa mushipiditu.”
Shi tusumininwe kulekela ne kwilwa bilubo bitulubila banabetu, nabya tukendelela kulama “kijimba kya ndoe kilungila pamo.” Kishima kya Kingidiki kyalamwine bu “kijimba . . . kilungila pamo” mu Bene Efisesa 4:3 i kyalamunwe bu “nungilo” mu Bene Kolose 2:19. Nungilo i kijimba kikomo kilungilanga pamo mukupa umo ku mukwabo. Muswelo umo onka, ndoe, ne buswe botusenswe banabetu, bitukwashanga tupwane nabo nansha shi kudi kubulwa kumvwañana.
Nanshi, shi mwanetu mu lwitabijo wetulubila, wetusanshija, nansha kwitulobeja, tulongei bukomo bwa kumumona senene pa kyaba kya kumufutulula. (Kol. 3:12) Batwe bonso byotudi ba kubulwa kubwaninina, padi nobe kitatyi kimo kodi mulubile muntu kampanda. Kulama uno mwanda mu ñeni, kukakukwasha ulonge bukomo bwa “kulama bumo bwa mushipiditu.”