Mpangiko ya Kubungakana kwa pa Bula kwa Difuku Dimo

¹ Nansha binanda, majulunale, ne bafundiji byobatumbija bupeta bwa ku ngitu, ino Kinenwa kya Leza akyo kitusoñanya amba ‘Ikalai Bampeta mu Mingilo Milumbuluke.’ (1 Tem. 6:18) Uno o mutwe wa mwanda wa kubungakana kwa pa bula kwa difuku dimo kusa kushilula mu Kweji 9, 2002. Le i kukankamikwa’ka kotukakankamikwa ku kuno kubungakana?

² Mutadi wa kipindi ukalombola mushintulwila kishima ‘Kwikala Bampeta ku Meso a Leza,’ kadi ukepangula ne banabetu bamobamo bekankila’ko kwikala na bupeta bwa ku mushipiditu. Muneni umpempudi ukalombola mu dishikulu dyandi dibajinji muswelo wingila bantu ba Leza “Mingilo Milumbuluke mu Kino Kitatyi kya Mwangulo.” Umo ne umo umbukata mwetu ukakankamikwa kubandaula muswelo wakokeja kwingila bininge na bengila mwingilo wa mwangulo witupele Leza wingilwa dyalelo.

³ Bine twitembanga mpata bankasampe bene Kidishitu potwibamonanga bendelela na kulondalonda bupeta bwa ku mushipiditu! Kino kitumbijanga Yehova kadi kikwashanga bankasampe bale kyalwilo kilumbuluke kya kukekala na madyese a mingilo mu mafuku a kumeso. Kipindi kinena amba “Twanyei Bankasampe Pangala pa Mingilo Milumbuluke ya Kutumbija Yehova Yobengila” kikalombola mingilo milumbuluke ingilanga bankasampe bene Kidishitu mu wenu mwaba.

⁴ Le kwendelela na kwingila mingilo milumbuluke kulupulanga bipa’ka? Muneni umpempudi ukesambila pa uno mwanda mu dishikulu dyandi dya mfulo dinena amba “Endelelai na Kwingila Mingilo Milumbuluke Nabya Mweselwe Madyese na Yehova.” Ukabandaula miswelo iná yotweselwanga madyese mavule: (1) ku muntu ku muntu, (2) mu bisaka, (3) mu kipwilo, ne (4) mu bulongolodi busambakene ntanda yonso.

⁵ Boba bapwile kala kwipāna kudi Yehova, uno i mukenga wabo wa kubatyijibwa. Shi wi mwiteakanye kukatabula dino ditabula, nankyo pelakana ukayukije mutadi mwimaniji.

⁶ Shi abaleta musapu ulombola difuku dikalongwa kubungakana mu wenu mwaba, nabya alwila’ko kukwata mpangiko kampanda mwa kukataninwa’ko. Longa buninge bwa kufika kumeso kwa kitatyi mwa kwimbila na bemba lwimbo lubajinji ne kulonda milombelo ya ñanjilo. Kutanwa ku mpangiko yonso ya kubungakana kwa pa bula kwa difuku dimo ne kwiilonda na katentekeji kuketupa bukomo bwa kulondalonda nyeke mwiendelejo wa kwitwikadija bampeta babinebine ku meso a Yehova, Leza wetu.