Vulukai Banunu ba Kikōkeji
1 Ana ‘kādipo ubulwa kutanwa mu tempelo’ nansha byaādi mukaji wa kishala kadi mununu wa myaka 84. Kikōkeji kyandi kyātengele Yehova ku mutyima, wāmwesela dyese dya kashā. (Luka 2:36-38) Dyalelo kudi batutu ne bakaka bavule badi na mushipiditu pamo na wādi na Ana nansha byobalwa na bikambija. Shi bano banabetu ba kikōkeji abatanwa na makambakano a misongo mikomo nansha a kukolejibwa na bununu, kyaba kimo bakokeja kupungila. Tubandaulei’ko miswelo imoimo mifike’po yotukokeja kwibakankamika ne kwibakwasha balame būmi bwabo buyampe bwa ku mushipiditu.
2 Kupwila ne Mwingilo: Shi bamo bakwasha’ko na buswe banunu ba kikōkeji mu lwendo, bavule bakapēlelwa mpata kutanwa ku kupwila kwa bwine Kidishitu kitatyi ne kitatyi. Kwibakwasha uno muswelo kukōbaka ku mushipiditu bano banabetu ba kikōkeji ke beje myaka mivule mu mwingilo, kadi ne kipwilo nakyo kikamwena’mo biyampe. Lelo nobe kodi kala mwele kuboko ku uno mwingilo mulumbuluke? —Bah. 13:16.
3 Kutambila mu mwingilo kitatyi ne kitatyi kuletelanga bene Kidishitu babine nsangaji ne kuloelelwa. Ino kutambila’mo namino i bulwi bukatampe kudi banunu ne ba bulema. Le bibwanika kumvwañana’ko na umo mu bano baswe ekale bu ‘mwingidi nobe’ wa kukutwala mu mwingilo wa busapudi bwa muswelo kampanda? (Loma 16:3, 9, 21) Padi ukokeja kumwityila kusapula nandi busapudi bwa ku telefone nansha kwenda nobe mu kujokela’mo kupya nansha ku kifundwa kya Bible. Shi uno mununu kakishetukangapo pa lubanza, le mwifundi wa Bible kakokejapo kwiya kwandi kulonda bifundwa?
4 Kwifunda ne Kisense: Kyaba ne kyaba, banabetu bamobamo betanga mununu nansha wa bulema kutanwa ku kifundwa kyabo kya kisaka, nansha kukefundila kwandi ku njibo. Kaka umo waselele bandi bana babidi bakefundila kifundwa kyabo kya mu Dibuku Dyami dya Mānga ya mu Bible ku njibo ya kaka mununu, abo bonso bakankamikwa na kisense’kya. Banabetu ba uno muswelo basangelanga ne kwitwa bidibwa nansha kyaba kikwabo kyomwitanina pamo. Shi ba bulema kebadipo na bukomo bwa kwenda kulampe, lelo wabulwa’po kukebanangila, washikata nabo kyaba kampanda, webatangila, walombela nabo, nansha kwibabangila mu kīpi kamwanda kampanda kakankamika?—Loma 1:11, 12.
5 Yehova ukwete na bulēme bukatampe banunu ba kikōkeji. (Bah. 6:10, 11) Netu tukokeja kumwiula na kwibatendela ne na kwibakwasha balame būmi bwabo buyampe bwa ku mushipiditu.