Tufundijei Bakwetu Ludimi Lutōka
1 Batumoni ba Yehova i bantu badi umbumo, kisaka kya bana na bana kujokoloka ntanda yonso, nansha byobatambile ‘mu mizo, mu bisaka, mu bantu ne mu ndimi’ mivulevule. (Kus. 7:9) Kino i kya kutendelwa mpata mu ino ntanda ya dyalelo miyule nkalañani. Lelo buno bumo i bubwanike namani? I bubwanike mwanda i betushinte abetupe “ludimi lutōka.”—Zef. 3:9.
2 Bipa bya Kutendelwa: Lelo ludimi lutōka i ludimi’ka? I kwivwanija koloke kwa bubinebine butanwa mu Kinenwa kya Leza butala Yehova ne mpango yandi, kupityidila bubinebine butala Bulopwe bwa Leza. Buno bubinebine busambakanibwanga kupityila mu mukola wa pano panshi umweka na meso, “umpika wabinebine ne wamanwa,” monka mwālaile’kyo Yesu. O mwanda bantu “ba mu ndimi yonsololo ya mizo” batwela mu mutōtelo wabine.—Mat. 24:45, NW; Zek. 8:23.
3 Bano bantu mobenda befunda ludimi lutōka, mutyima wabo nao wenda wibatonwena ku kukwatañanya būmi bwabo na misoñanya ya Yehova. Bayuka mwa kwikadila ‘babambakanibwe pamo mu ñeni imo ne mu mulangilo umo.’ (1 Kod. 1:10) Kadi bufundiji bwa Leza bubutulanga mobadi mwiendelejo moloke ne muneneno muyampe, wa bubinebine, nakampata kitatyi kyobasapwila bakwabo myanda miyampe. (Tet. 2:7, 8; Bah. 13:15) Kuno kushinta konso kutendelwa namino kupejanga Yehova bulēme.
4 Tulete kifwa, kudi mwana-mulume umo wasapwidilwe myanda miyampe, wadi na bipangujo bivulevule, ino bamulondolola byonso na Bible. Myanda yaaivwene pa kumutenga, washilula kufunda misunsa ibidi pa yenga, upwila ne kupwila. Watulumukile mpata pa kumona muswelo obamutundaile na kizaji ku Njibo ya Bulopwe, ako kuntu kwadi kuvudile bantu ba musaka ungi. Ne kwija kwine mpika, aye ne wandi mukaji bashinta bintu bivule mu būmi bwabo, babatyijibwa ne kubatyijibwa. Tamba penepa ke mukwashe kintu kya bantu 40, kubadila’mo ne babutule bavulevule ba mu kisaka, nabo kebengidila Yehova. Panopano washilwile kwingila bu pania, nansha byadi na bulema.
5 Tufundijei Bakwetu: Bimbidikita bya ntanda bibafikija bantu bavule ba mityima myoloke ku kubandaula dipya mulangilo wabo ne būmi bwabo. Tufwaninwe kwikala na mutyima wa kwibakwasha, mwādi mwikadile nao Yesu. Bwanga bukatampe bwa kukwasha bano bantu basangela musapu ne mutyima umo nabo bayuke ludimi lutōka i kujokela’mo kupya ne bifundwa bya Bible bifike’po.
6 Musapwilo mufike’po wa kukwasha nao bantu bavudilwe kaji i uno wa kwendeja kifundwa kya Bible kīpi enka pakīmene muntu mu kibelo kyandi’pa. (km 5/02 p. 1) Lelo kodi mutompe buno bwino? Kitatyi kyowiteakanya ku kujokela’mo kupya, tonga musapwilo ukwatañene biyampe na musapwilwa mu yoya itanwa pa dyani dya ntentekelo dya Mwingilo Wetu wa Bulopwe wa Kweji 1, 2002. Misapwilo mivule idi pa dino dyani dya ntentekelo i miletelwe kukokela mīsambo mu mukanda Kisaka Leza nansha mu dibuku Buyuki. Wiibidije musapwilo owatonga mwa kusapwila pampikwa kushishikita tamba ku ntwelelo kufika ne byotwela mu mīsambo imanine pa umo wa mu misango. Sañuna mu musango kisonekwa kimo nansha bibidi bya kutanga ne kwisambila’po, kupwa ipangula kipangujo kya kuvuya nakyo mīsambo. Kino kikamukokela mu musango osaka kwiya kwisambila’po mu bupempudi bukwabo.
7 Bantu ba Yehova beselwanga madyese mavule pa mwanda wa kuyuka kobayukile ludimi lutōka. Shi ke pano, tukwashei na kininga bakwetu nabo belunge netu mu ‘kwita kotwita pa dijina dya Yehova’ ne mu “kumwingidila ne mutyima umo.”—Zef. 3:9.