Mpangiko ya Kubungakana kwa pa Bula kwa Difuku Dimo
Dyalelo kudi misapu mivule īsambila pa mwa kulamina mutyima wetu mukomo mwanda wa twikale biyampe ne na būmi bulampe. Nanshi bukomo bwa mutyima wetu wa kyelekejo bo bwine bwa mvubu. O mwanda mwine, mutwe wa mwanda wa kubungakana kwa pa bula kwa difuku dimo kukashilula mu Kweji wa 9, 2003 i mwendele’mo: “Kwingidila Yehova ne Mutyima Mubwaninine.” (1 Bil. 28:9) Le i bika byotutengele kukefunda’ko?
Mutadi wa kipindi ukesambila pa mwanda unena’mba “Tukwashei Bakwetu Nabo Bengidile Yehova na Muya Uswele.” Bwipangudi bukalombola patōka nsangaji ilupukanga mu kutamija kusangela musapu kwa bantu ne mu kwendeja bifundwa bya Bible na boba basenswe kwingidila Yehova. Bine, bemvwaniki bonso bakatambula busengi ne kukankamikwa na dishikulu dibajinji dya muneni umpempudi dinena’mba: “Tulamei Mityima Yetu mu Ino Ntanda ya Kavutakanya.” Kipimpo kya lubanga kikafula na dishikulu dya lubatyijo.
Kyolwa, kipindi kinena’amba: “Kolola Kuboko kwa Bukwashi” kikalombola muswelo wa kukwasha bakwetu. Bambutwile bakalonga kika mwanda wa kukinga mityima ya babo bana ku lupusa lubi ne kwibakwasha bafwene kudi Yehova? Kipindi kinena’mba “Kwasha Bobe Bana Baloelelwe Mudi Yehova” kikebapa milangwe ya kamweno ne kadi kikalombola mwa kwibakwashisha.
Lelo tumwenanga kamweno mu mpangiko yonso ikwata’ko Yehova mwanda wa kulama mutyima wetu wa kyelekejo mukomo ne muyampe? Dishikulu dya mfulo dya muneni umpempudi dinena’mba, “Lama Mutyima Mubwaninine Poingidila Yehova,” dikemanina pa miswelo iná ya kamweno itala pa mpangiko yetu ya mwa kwilamina ku mushipiditu. Le i bukomo’ka ne i bitatyi binga byotupityijanga mu kulombela, mu kwifunda Kinenwa kya Leza, mu kusapula na bupyasakane, ne mu kisense pamo na bakwetu bene Kidishitu? Mwene tufwaninwe kwilemununa mu ino myanda yonso?
Yehova witwita luno lwito, amba: “Tá obe mutyima ku bulombodi, kadi ne matwi obe mene ku binenwa bya kuyukidija.” (Nk. 23:12) Witeakanye tamba pano mwa kukataninwa ku buno bufundiji bwa Bisonekwa bwa mvubu bwa difuku dimo. Kutanwa’ko kukakupa buninge bwa kwendelela kwingidila Yehova na mutyima mubwaninine ne na muya uswele.