Mpangiko ya Kubungakana kwa pa Bula kwa Difuku Dimo

Diso i bupunga bwa kutendelwa. (Mit. 139:14) Kadi dibambilanga enka pa kintu kimo kyonka mu kyaba. Kino i kya bine pa bute pa bute ne mu muneneno wa kyelekejo mwine. Shi tusaka tumone biyampe ku mushipiditu ne kwikala batale, ne tufwaninwe kuta mutyima ku kulonga kiswa-mutyima kya Leza. Bilabi byobyenda bivula mu ntanda ya Satana, i kyendele’mo nanshi mpangiko yetu ya kubungakana kwa pa bula kwa difuku dimo kwa mu mwaka wa mingilo wa 2006 ikale na uno mutwe wa mwanda unena’mba “Ikalai na Diso Ditūkanye”!​—Mat. 6:​22, NW.

Le tukalonga bika pa kusaka tutambule madyese atamba kudi Yehova? (Nk. 10:22) Kino kipangujo kikabandaulwa mu kipindi kinena amba “Angula Madyese a Kwikala na Diso Ditūkanye.” Bwipangudi bukakokela milangwe pa byabuyabuya bikokeja kumwenwa mu kulonda misoñanya ya mu Bisonekwa. Dishikulu dibajinji dya muneni mupempudi, dinena amba “Ikala na Diso Ditūkanye mu Ntanda Imbi,” diketudyumuna ku bintu bikokeja kukoleja būmi bwetu ne kusupaija bityetye būmi bwetu bwa ku mushipiditu. Tukayuka kadi shi kutonga “kyokya kiyampe” kulomba kulonga bika ne bika.​—Luka 10:42.

Le bambutwile ne bantu bakwabo bakokeja namani kukankamika bene Kidishitu bankasampe babambile meso pa bintu bya ku mushipiditu? Kipindi kinena amba “Bambutwile Basa Miketo Yabo mu Kitondo” ne kyokya kinena amba “Bankasampe Bafikila pa Bitungo bya ku Mushipiditu” bikekala na myanda ikesambwa na bambutwile ne bankasampe pa uno mwanda wa kamweno. (Mit. 127:4) Dishikulu dya mvuyo dya muneni mupempudi dikabandaula muswelo otukokeja kutabwila pamo na bulongolodi bwa Yehova ku muntu ne muntu, mu kisaka, ne mu kipwilo.

Twikale bapya belunga ku bubinebine nansha shi ketudi bengidile Yehova mu bula bwa makumi a myaka, i kya kamweno ‘twikale na diso ditūkanye.’ Mpangiko ya kubungakana kwa pa bula kwa difuku dimo iketukwasha pa kino.