Mpangiko ya Kubungakana kwa pa Bula kwa Difuku Dimo

Shi twamona nansha kwivwana kidyumu kampanda ino ne kwikilonda mpika, tukokeja twatanwa na musala. Kulonda bwendeji bwa ku mushipiditu bupāna Yehova ne kulongela monka nako kudi na mvubu kutabukididila. Kino kyo kine kikakomwa mu mpangiko ya kubungakana kwa pa bula kwa difuku dimo kwa mwaka wa mingilo wiya’ko. Mutwe wa mwanda unena’mba: “Dyumukai Pangala pa Muswelo O Mwimvwana.”​—Luka 8:​18, Bisonekwa Bitokele.

Muneni mupempudi ukabandaula mu dishikulu dyandi dibajinji muswelo witutala dyalelo madingi a mu mashapita mabajinji a mukanda wa ku bukomo bwa mushipiditu wa Polo kudi Bahebelu. Mu dishikulu dyandi dya mfulo dinena’mba: “Tutei Nyeke Mutyima ku Bufundiji bwa Leza” ukakwasha’mo bonso bebandaule kuyuka shi bine bevwananga Yehova, wandi Mwana, ne ‘umpika wa binebine ne wa manwa.’​—Mat. 24:45.

Bipindi bivule bya mpangiko bikekala bya kamweno nakampata ku bisaka. Kipindi kinena amba “Bisaka Bivwana Kinenwa kya Leza Kwampikwa Kulabikwa” kiketukwasha twilame ku bintu bya ino ntanda bibwanya kona būmi bwetu bwa ku mushipiditu. Mukekala ne bwipangudi bwa boba bashintyile būmi mwanda wa kutūla bintu bya ku mushipiditu pa kifuko kibajinji. Kipindi kinena’mba “Kwivwana na Katentekeji Kinenwa kya Leza Mokukankamikila Bankasampe” kikekala na bwipangudi ku bankasampe balamete ku bubinebine ku masomo, pobadi na bakwabo, nansha mu mwingilo. “Bana Bevwana Leza ne Kufundijibwa,” kino nakyo kiketukwasha tuleke kupēlula bukomo bwa kufunda budi na bana batyetye. Bwipangudi ku banuke ne babo bambutwile buketukwasha tumone kamweno kadi mu kufundija bana mashinda a Yehova tamba bunkasa bwabo.

Nansha bikele Satana bu “ñongoji wa panopantanda ponso,” ino Yehova wendelelanga kulombola bengidi bandi ba kikōkeji dishinda mobafwaninwe kunangila. (Kus. 12:9; Is. 30:21) Kwivwana na katentekeji madingi andi ne kwialonda na kikōkeji mu būmi bwetu kuketwikadija bantu ba ñeni, ba nsangaji, ne bakamona būmi bwa nyeke.​—Nk. 8:32-35.