Ikala na Diso Ditūkanye
1. Lelo kwikala na diso ditūkanye kushintulula bika, ne mwanda waka kudi na mvubu?
1 Yesu, mu Busapudi bwandi bwa ku Lūlu, wākokele milangwe pa lupusa lukatampe ludi na meso a kyelekejo nansha’mba a ku mushipiditu mu būmi bwetu bonso. Wānene amba: “Shi kadi dīso dyobe ditōke to-ō [i ditūkanye, NW], nankyo ne mubidi obe onso udi bwelwa to-ō. Ino kadi shi dīso dyobe dīkale dibi, nabya ne mubidi obe onso udi fututu.” (Mat. 6:22, 23) Diso ditūkanye i dyodya dibambile pa kitungo kimo—kulonga kiswa-mutyima kya Leza—kwampikwa kulabikwa na kukambakena bipitepite bintu bya ku ngitu. (Mat. 6:19-21, 24-33) Lelo i bika biketukwasha twikale nyeke na diso ditūkanye?
2. Kinenwa kya Leza kitukankamika kumona bintu bya ku ngitu muswelo’ka?
2 Tutamijei Kuloelelwa: Kumwena ba mu kipango kyetu bisakibwa bifwaninwe i kiselwa kyotupēlwe mu Bisonekwa. (1 Tem. 5:8) Inoko kino kekilombepo twielelele mu kukimba bintu’nka bilumbuluke ne bya panopano. (Nk. 27:20; 30:8, 9) Pa kyaba kya kulonga namino, Bisonekwa bitusoñanya kuloelelwa na bisakibwa bya umbūmi, “bidibwa, ne bivwalwa.” (1 Tem. 6:8; Bah. 13:5, 6) Kuta kutwi ku ano madingi kuketukwasha twikale na diso dibambile pa bintu bifwaninwe.
3. I bika bibwanya kwitukwasha twepuke kulēmenenwa?
3 Tukekala bañeni shi twepuka kulēmenenwa na mapu, na bintu byampikwa kwendela’mo, nansha na kukimbakimba byobya bitujimijija bitatyi ne bilomba kwibikambakena bipite. (1 Tem. 6:9, 10) Le i muswelo’ka otukekala bañeni? I shi tulangulukila pa byotulonga, ebiya twebitūla mu milombelo, ne kubandaula na mutyima wampikwa budimbidimbi shi kebikakalakanyapo bintu bya ku mushipiditu. Twikalei basumininwe kutūla bintu bya ku mushipiditu pa kifuko kibajinji mu būmi bwetu.—Fid. 1:10; 4:6, 7.
4. Mwanda waka tufwaninwe kukimba miswelo ya kupēleja būmi bwetu?
4 Pēleja Būmi Bobe: Kintu kikwabo kya kwitukwasha tukomene kukokwa na kuswa bya bupeta i kukimba mwa kupēlejeja būmi. Tutu umo wamwene amba kisaka kyandi kibwanya kwikala biyampe kwampikwa bintu bya ku ngitu bipite bungi wanene amba: “Pano ke noñanga bivule bya kukwasha banabetu mu kipwilo. Nkulupile amba Yehova weselanga bengidi bandi bonso kitatyi kyobatula mutōtelo wa bine kumeso kwa tumweno twabo.” Lelo wabulwa’po nobe kusangela ano madyese makatampe na kupēleja būmi bobe?
5. Mwanda waka bitusakila kulonga bukomo pa kwikala na diso ditūkanye?
5 Bitusakila kulonga bukomo pa kukomena lupusa lwa Satana, ntanda yandi iswele bya bupeta, ne ngitu yetu yampikwa kubwaninina. Pa kyaba kya kubambila meso etu kungi, twendelelei kwiabambila ku kulonga kiswa-mutyima kya Leza ne pa lukulupilo lwetu lulēme lwa būmi bwa nyeke.—Nk. 4:25; 2 Kod. 4:18.