Le Kijila kya “Diso ku Diso” Kishintulula Bika?

Bilondolola Bible

Kijila kya “diso ku diso” kyādi mu Bijila bya Leza byobāpele Isalela waka kudi Mosesa, kadi kyāpitulukilwe’mo na Yesu mu Busapudi bwandi bwa ku Lūlu. (Mateo 5:38; Divilu 21:24, 25; Kupituluka mu Bijila 19:21) Kishintulula’mba pa kutyibila banonga-bibi mambo, muntu wādi ufwaninwe kupebwa mfuto ikwatañene na kilubo kyandi.a

Kijila kyādi kingidijibwa shi muntu wasanshija mukwabo ku kusaka. Mosesa wānenene pa mwanda utala yewa ulubile ku kusaka’mba: “Kityumuke pa kityumuke, diso ku diso, dino ku dino, ukalemekwa monka mwaalemekañena.”—Bene Levi 24:20.

Le kijila kya “diso ku diso” kyādi na kitungo’ka?

Kijila kya “diso ku diso” kekyādipo kipa muntu lupusa lwa kwaluja kinongo aye mwine. Ino kyādi kikwasha batyibi batongwe, bapāne mfuto mifwaninwe, pampikwa kasumalomo nansha kilomonyeka.

Kadi kyādi kikwasha muntu ukanina kusanshija bakwabo ku kusaka aleke kulonga kibi. Bijila binena’mba: “Boba bashele’ko bakevwana ne kukwatwa moyo, kadi kebakalongapo monka kibi bwa kino’ki mu bukata mobe.”—Kupituluka mu Bijila 19:20.

Le kijila kya “diso ku diso” kitala ne bene Kidishitu?

Mhm, bene Kidishitu kebakutyilwepo na kino kijila. Kyādi mu Bijila bya Mosesa, bine byātalwilwe’ko na lufu lwa Yesu lwa bu kitapwa.—Bene Loma 10:4.

Inoko, kino kijila kitukwasha twivwanije senene mulangilo wa Leza. Kimfwa, akyo kilombola’mba Leza usenswe boloke. (Ñimbo ya Mitōto 89:14) Kadi kilombola misoñanya yandi myoloke, kimfwa musoñanya wa amba banonga-bibi bafwaninwe kulemununwa “mobyendele.”—Yelemia 30:11.

Milangwe mifwe pa kijila kya “diso ku diso”

Milangwe mifwe: Kijila kya “diso ku diso” kyādi kya kasumalomo.

Bubine: Kijila kekyādipo kilomba kwingidija boloke mu muswelo mubi. Ino ponso pobādi bekingidija biyampe, batyibi bādi bapa muntu ulongele bibi mfuto enka shi ababandaula bidi mwikadile myanda ne kujingulula shi bine muntu walongēle ku kusaka. (Divilu 21:28-30; Umbadilo 35:22-25) Mu uno muswelo, kijila kya “diso ku diso” kyēbakweshe baleke kupa muntu mfuto mipite kipimo.

Milangwe mifwe: Kijila kya “diso ku diso” kyālengeje bantu bendelele kwialwija kinongo.

Bubine: Bijila bya Mosesa binena’mba: “Kufwaninwepo kulubula kinongo nansha kulamina bana ba bantu bobe kīji.” (Bene Levi 19:18) Pa kyaba kya kulengeja bantu bealwije kinongo, Bijila byēbakankamikile bakulupile mudi Leza ne mu bidye byātūdilwe’ko mwanda wa kupwa bintu bibi.—Kupituluka mu Bijila 32:35.

Yesu walemununa milangwe mifwe

Yesu wādi uyukile amba bantu bamo bādi banyengakanya kijila kya “diso ku diso.” Wēbalemunwine paānenene amba: “Mwaivwene amba kyānenenwe amba: ‘Diso ku diso ne dino ku dino.’ Ino ami nemunena’mba: Kemwakīkokai na muntu mubi, ino yewa yense ukukupila lupi ku kutama kwa lundyo, mwalamwine ne kukwabo kwine.”—Mateo 5:38, 39.

Yesu wanena pano amba, “mwaivwene amba kyānenenwe.” Mobimwenekela wādi wisambila pa Bayuda bamo bendeji ba bipwilo bādi bafundija kwaluja kinongo. Adam Clarke mufundi umo wa Bible walembele amba: “Bimweka’mba Bayuda bātūdile’ko kijila kya [diso ku diso] . . . bu kabepelo ka kulamina kīji, ne kulonga bilongwa byonso bya kwaluja kinongo.” Pa kukankamika kwaluja kinongo, bano bendeji ba bipwilo banyengakenye mulangwe mwine wādi mu Bijila bya Leza.—Mako 7:13.

Ino Yesu wālombwele amba buswe po pādi pemanine Bijila bya Leza. Wānenene amba: “‘Sanswa Yehova Leza obe . . .’ Ino’i yo mbila itabukile bukatampe kadi yo mibajinji. Ya bubidi, iifwene nayo, i ino: ‘Sanswa mukwenu mowisanshilwe abe mwine.’ Pa ino mbila ibidi po pemanine Bijila byonsololo.” (Mateo 22:37-40) Yesu wāfundije amba buswe bukayukanya balondi bandi ba bine, ke mutyimapo wa kwaluja kinongo.—Yoano 13:34, 35.

a Uno musoñanya wa mungya bijila, wādi witwa kyaba kimo ne mu kilateni bu lex talionis, wādi ne mu myanda ya bisambo bya bantu bakwabo ba pa kala.