Tutei Bakwetu Mutyima—Na Kwibatala Meso Potwisamba Nabo
1 Shi tusapula mu kitango kya bantu nansha ku njibo ne njibo, divule twitalanga na bantu mpala na mpala kumeso kwa kwisamba nabo. Mu kino kitatyi kīpi, tukokeja kumona kupityila ku bilomboji bya mpala yabo byobalanga pa kwiya kotwaiya nansha pa ngikadilo yobadi’mo. Nabo bakokeja kuyuka malango etu. Mwana-mukaji umo unena pangala pa Kamoni waile kumunangila amba: “Mvulukanga mimungomungo yandi ya nsangaji. Bine, yaunkokele mute mutyima.” Kino kyo kyalengeje mwana-mukaji’wa ateje myanda miyampe.
2 Kwitala na bantu mpala na mpala dyo dishinda diyampe ditufikijanga ku kusapula bukamoni mu busapudi bwa mu bipito nansha mu bifuko mudi bantu bavule. Tutu umo wadi utala meso boba badi bamufwena. Shi meso andi abetana na abo, wamungamunga, ebiya ku mfulo webalombola mapepala. Uno musapwilo wamufikije ku kwisamba mīsambo itobala na bantu bavule ne ku kwibashila mabuku mavule.
3 Nañuna Mumwena Bakwenu: Kwendelela na kutala bantu mu mpala kuketukwasha tunañune mobamwena bintu. Kimfwa, shi muntu kemvwenepo byotunena nansha wapele’byo, bipela kumona’byo mu mumwekelo wa mpala yandi. Shi udi na byakulonga bivule nansha mutyima keukidipo mu kifuko, tukamona’byo ku mumwekelo wa mpala yandi. Penepa netu tukasendulula nansha kwipipija musapwilo wetu. Kukengelela malango a bakwetu o muswelo muyampe wa kulombola amba twibatele mutyima.
4 Bubinebine ne Kusumininwa: Mu matanda mavule, kutala muntu mu mpala i kilomboji kilombola amba muntu’wa udi na mutyima wa bubinebine. Ivwana byānene Yesu pamwipangwile bandi bana ba bwanga amba: “I anyi ukapanda?” Bible unena’mba: “Yesu webatala tu soo, kanena’mba: ‘Bikomena bantu, ino kudi Leza byonso i bipele tu!’” (Mat. 19:25, 26, MB) Bine kusumininwa kwa Yesu kobamwene mu meso andi kwabwejeje’ko kikulupiji mobadi. Netu mo monka, potwendelela na kutala bantu mu mpala, bakamona amba tusapulanga musapu wa Bulopwe na bubinebine ne na kusumininwa.—2 Kod. 2:17; 1 Tes. 1:5.