Lelo Udi na Diso Ditōka?
1. Lelo kwikala na ‘diso ditōka’ kushintulula bika?
1 Byotumona byo biludika bilongwa byetu. Bine bino binenwa bya Yesu i bya bine, bya amba: “Shi kadi dīso dyobe ditōke to-ō, nankyo ne mubidi obe onso udi bwelwa to-ō.” (Mat. 6:22) Shi diso dyetu i “ditōke” ku mushipiditu, dikemanina pa kitungo kimo—kulonga kiswa-mutyima kya Leza. Tukatūla Bulopwe pa kifuko kibajinji ne ketukalabikwapo na bya bituputupu bya ku ngitu nansha twaji tukalakanya mwingilo wa busapudi.
2. I bika bibwanya kona mumweno wetu, ne i bika biketukwasha?
2 Mvubu ya Kwibandaula: Mumweno wetu ukokeja konwa na byobya bilombola bisanji amba byo byotusakilwa nansha na bintu bidi na bakwetu. Kumeso kwa kupota kintu kyotusaka nansha kushilula kaji kakatampe kalomba kitatyi, lupeto, nansha bukomo, i biyampe bidi tubadikile “kubala lupeto” na kwiipangula amba, ‘Le kino kintu nansha kaji kakalumbulula mwingilo wa Yehova’ni nansha kakajikakanya’o?’ (Luka 14:28; Fid. 1:9-11) I kya tunangu kubandaula kyaba ne kyaba muswelo otubwanya kupēleja būmi mwanda wa tulonge bivule mu mwingilo.—2 Kod. 13:5; Ef. 5:10.
3. I bika byotwifundila ku kimfwa kya kaka umo wapēleje bwandi būmi?
3 Pashilwile kaka umo mwingilo wa bupania wa lonso, kalekelepo kaji kandi ka nshikije-dyuba nansha byokwadi kaji kakwabo ka kitatyi kityetye inoko ka lupeto lubwane pa bisakibwa byandi. Wafudile ku kunena’mba: “I kutupu muntu ubwanya kwingidila bamfumwandi babidi. Nadi mfwaninwe kwibudija byonsaka mwa kumwena enka bisakibwa byami. Namwene amba shi bintu bya ku ngitu bibaije ke bya bitupu, kadi byadi bimpungija na kukimbakimba’byo.” Ngikadilo yandi yamukweshe apēleje būmi bwandi, ne kushinta kaji amba endeleje mwingilo wa bupania.
4. Mwanda waka kulama diso ditōka ke kwa kampeja-bukidi pano?
4 Kampeja-bukidi ka kino kyetu kitatyi ko kene kalengeja tumone mvubu ya kulama diso ditōka. Difuku dyonso dipita ditufwenyanga ku mfulo ya ino ngikadilo ya bintu ne ku ngalwilo ya ntanda impya ya Leza. (1 Kod. 7:29, 31) Shi tute mutyima pa mwingilo wetu, nankyo tukapandija būmi bwetu ne bwa boba betwimvwana bene.—1 Tem. 4:16.