Vwalai Kwityepeja
1 Nsongwalume umo mukumbi wakulupila mudi Yehova ne kushinda kalala ka mavita. (1 Sam. 17:45-47) Mwana-mulume mpeta waūminina kinzengele na kitūkijetyima. (Yoba 1:20-22; 2:9, 10) Mwanā Leza upa Shandi ntumbo ya kufunda kwandi konso. (Yoa. 7:15-18; 8:28) Kintu kya mvubu mikatampe mu bino bifwa byonso i kwityepeja. Ne dyalelo nadyo mo monka, kwityepeja i kwa mvubu mu ngikadilo yonso yotudi’mo.—Kol. 3:12.
2 Kitatyi Kyotusapula: Batwe bengidi bene Kidishitu tusapwilanga bantu ba miswelo yonso myanda miyampe na kwityepeja, kwampikwa kubanga muzo wabo, kitamina kyabo, nansha byobadi nabyo. (1 Kod. 9:22, 23) Shi kudi bamo ba kibengo, bapela musapu wa Bulopwe na kapuni, ketwibajokejejangapo mobalongela abo, ino twendelelanga na mutyima mutūke kukimba boba bafwaninwe. (Mat. 10:11, 14) Pa kyaba kya kukimba kutulumuna bakwetu na buyuki bwetu nansha na byotufundile, tukokelanga mutyima wabo ku Kinenwa kya Leza, mwanda tuyukile amba kidi na bukomo kupita kyo-kyonso kyotukokeja kunena. (1 Kod. 2:1-5; Bah. 4:12) Twiulanga Yesu na kupāna mitendelo yonso kudi Yehova.—Mako 10:17, 18.
3 Mu Kipwilo: Kadi bene Kidishitu bafwaninwe ‘kuvwala bumvubumvu bwa kwiingidila abo bene na bene.’ (1 Pet. 5:5) Shi tumona’mba bakwetu betutabukile bukata, nabya tukakimba muswelo wa kwingidila banabetu pa kyaba kya kukungila’nka abo betwingidile. (Yoa. 13:12-17; Fid. 2:3, 4) Ketukemonepo amba twi balēme kupita, ketubwanyapo kwingila mingilo pamo na ya kukomba ku Njibo ya Bulopwe.
4 Kwityepeja kwitukwasha twikale ‘kwifudila batwe bene na bene mu buswe.’ (Ef. 4:1-3) Kwitukwasha twikale kukōkela boba batongelwe kwitwendeja. (Bah. 13:17) Kwitutonona twitabije madingi onso etudingilwa nansha kulemununwa kwitulemununwa. (Mit. 141:5) Kadi kwityepeja kwitutakika tukulupile mudi Yehova mu mingilo yonso yotupebwa mu kipwilo. (1 Pet. 4:11) Tujingulwile’mba bushindañani bonso kebutambepo ku bukomo bwa muntu, ino butamba ku madyese a Leza, pamo’nka mwādi muyukile’kyo Davida.—1 Sam. 17:37.
5 Ku Meso a Leza Wetu: Kintu kine kya mvubu kupita byonso kitusakila i kino, ‘twikōkejei ke tudi ba bumvu pa kuboko kwa bukomo kwa Leza.’ (1 Pet. 5:6) Shi twikonda na bikambija, ketukabulwepo kwabila bunyongolodi bukaleta Bulopwe. Ino tutūkije mutyima na kwityepeja, tukungile pakafikidija Yehova milao yandi mu kitatyi kyandi kitungwe. (Yak. 5:7-11) Monka mokyāikadile kudi Yoba wālamine bululame, netu tukata dibajinji mutyima ku ‘dijina dya Yehova amba dyeselwe.’—Yoba 1:21.
6 Mupolofeto Danyele wādi ‘wiubija aye mwine kumeso a Leza wandi’ ne kweselwa wāeselwa na kupebwa buntu bwa Yehova ne madyese malumbuluke mavule. (Dan. 10:11, 12) Batwe netu mo monka, tuvwalei kwityepeja pa kuyuka’mba “mpalo ya kwityepeja ne kwakamwa Yehova e bupeta ne bulēme ne būmi.”—Nk. 22:4.