Mwena Byabuyabuya mu Kifundwa kya Kitabo Approchez-vous de Jéhovah
1 Twasangedile mpata kutambula kitabo Approchez-vous de Jéhovah (Fwenai Kudi Yehova) ku Kitango kya Distrike “Basapudi Bapyasakane ba Bulopwe.” Bavule bashilwile kutanga’kyo ponka na ponka. Bangi bakwabo nabo monka basangedile kulongela monka kupityila ku kisonekwa kya mwaka wa 2003: “Fwenai kudi Leza, nandi ukemufwena.”—Yak. 4:8.
2 Mu Kweji 3 tukashilula kubandaula mu Kifundwa kya Kitabo kya pa Kipwilo kitabo Approchez-vous de Jéhovah. Le i muswelo’ka otukamwena mpata mu kifundwa kyetu? Kwiteakanya i kwa kamweno. Shapita ne shapita ukefundwa mu mayenga abidi, ko kunena’mba i misango mityetye yonka ikekala ku mpangiko ya kifundwa kya yenga ne yenga. Kino kikemupa kyaba kya kuleta bushintuludi butamba ku mutyima bwimanine pa kifundwa kyenu ne pa kulangulukila pa bifundwa. Ne kadi i misango ibala-inga’tu ikabandaulwa mu mayenga a kipindi kya mfulo ya shapita idi na kupituluka’mo, mwanda wa kwilamina’ko kitatyi kya kunenena pa myanda ya pa bula ya kino kitabo.
3 Kushilwila pa shapita wa 2, ku mfulo kwa shapita ne shapita kudi kapango kanena’mba “Éléments de méditations” (Myanda ya kulangulukila’po). Kupwa’tu kwa kubandaula musango wa mfulo mu shapita, mutadi wa kifundwa kya kitabo ukesambila pa kano kapango pamo na kisumpi. Ukakankamika ba mu kisumpi balete milangwe yabo, na kukimba myanda milumbuluke itamba ku kulanguluka’po kwabo kwa mu Bisonekwa. (Nk. 20:5) Kutentekela ku bipangujo bidi mu kapango, ukokeja kitatyi kikwabo kwipangwila’ko bipangujo pamo na bino: “Ino myanda imulombola bika padi Yehova? Le itala būmi bwenu muswelo’ka? I muswelo’ka omukokeja kukwasha nayo bakwenu?” Kitungo kyandi ke kya kutompapo kisumpi byobayukile ne mu tubintu tutyetutye, inoko i kya kuleteja bushintuludi butamba ku mutyima.
4 Approchez-vous de Jéhovah i dibuku dimo dya pa bula. Nansha shi mabuku makwabo a “umpika wa binebine ne wa manwa” atumbijanga Yehova, dino’ko dyo dibuku dine disambile mu butuntulu bwadyo bonso enka pa ngikadilo ya Yehova. (Mat. 24:45-47) Bine, uno i mukenga usangaja’po kashā witutengele! Tusa kumwena byabuyabuya bivule kupityila ku kifundwa kya mushike kya bumuntu bwa Yehova. Shi ke pano, kifundwa kino kitukwashe tufwene kudi Tata wetu wa mūlu, ne twikale basumininwe nakampata kukwasha bakwetu nabo balongele monka.