Kifundwa kya Kitabo Adorez Dieu

Kitabo Adorez le seul vrai Dieu kyo kitūdilwe ku mpangiko ya kwifunda na bapya shi abapu kwifunda kitabo Buyuki. Byotusa kwifunda dino dibuku ku Kifundwa kya Kitabo kya pa Kipwilo tukekala bakumbanye mwa kwingidijija’dyo mu mwingilo, kadi diketukwasha tuswe ne kufwija’ko Yehova bikatampe pamo ne bulongolodi bwandi. Le i muswelo’ka otubwanya kukamwena ne pa mfulo mu kifundwa kyetu kya kitabo Adorez Dieu?

Kwendeja Kifundwa: Batadi ba kifundwa kya kitabo banenwe kukabanya senene kitatyi, mwanda tukabandaula shapita mutuntulu yenga ne yenga. Bakeepeja kulepeja mwisambo mu misango ya ku ngalwilo mwa kwilamina’ko kitatyi kifwaninwe kwisambila myanda mine ya mvubu mikatampe, ikalanga pavule pene ku mfulo kwa shapita. Kujokela mu kīpi mu myanda idi mu kapango ku mfulo kwa shapita ne shapita kukakwasha boba batenwe’mo kukwata myanda ya mvubu.

Bipangujo bya kulangulukila’po ne kwisambila’po bitanwa dya pa bukata bwa mashapita a kitabo Adorez Dieu. Mukokeja kutana kifwa kimo pa paje 48-49. Bino bipangujo kebifwaninwepo kutangilwa pamo na misango. Kitatyi kibandaula mutadi bino bipangujo pamo ne kisumpi, ukatangija bisonekwa bitelelwe’mo ne kwisambila’po mungya kitatyi.

Kwilongolola Kumeso kwa Kitatyi: Kulongolola biyampe kifundwa ke’nkapo tu kushika mishiko munshi mwa malondololo kete, mhm. Kulangulukila pa bisonekwa bitelelwe’mo kupityila mu milombelo kekuketukwashapo’nka kulongolola bushintuludi bwetu kete, ino nakampata kulongolola ne mityima yetu mine. (Eza 7:10) Batwe bonso tufwaninwe kwikankamika kupityila ku malondololo etu, ino na kulangila bakwetu nabo besambe.​—Loma 1:​11, 12.

Kifundwa kyetu kya kitabo Adorez Dieu kiketukwasha tufwene kudi Yehova ne kiketukumbanya mwa kukwashisha boba ba mityima miyampe nabo belunge netu mu kumutōta. (Mit. 95:6; Yak. 4:8) Nanshi batwe bonso tumwenei ne pa mfulo mu ino mpangiko ya ku mushipiditu.