Sangela Kwifunda Lelo I Bika Bine Bifundija Bible?

¹ Kintu kyaletele nsangaji ku Kitango kya Distrike “Kikōkeji kya Bwine Leza” i kulupulwa kwa dibuku Lelo I Bika Bine Bifundija Bible? Pano tusa kwingidija dino dibuku bininge mu mwingilo wetu wa budimi, nakampata mu kwendeja Bifundwa bya Bible ku mobo. Pa kino, tufwaninwe bidi batwe bene kupotolola dino dibuku dipya. O mwanda tusa kwifunda’dyo mu Bifundwa byetu bya Kitabo bya pa Kipwilo tamba mu yenga ushilula na mafuku 17 Kweji 4, 2006.

² Mwendeji wa Kifundwa kya Kitabo kya pa Kipwilo ukata mutyima ku bipangujo bidi ku ngalwilo kwa shapita ne shapita. Kupwa kifundwa kikendejibwa na kwipangula bipangujo bidi kunshi kwa paje. Bisonekwa bikatampe bikatangwa ne kwisambilwa’po, kadi kapango “Byobya Bifundija Bible” kadi ku mfulo kwa shapita ne shapita kakakwasha pa kupituluka mwanda kadi na malondololo a mu Bisonekwa a ku bipangujo bidi ku ntwelelo. Ukasangela kuleta bushintuludi mwanda dino dibuku disambanga myanda mu muswelo upēla, mwivwanike, ne usangaja.

³ Mbwejo ya dino dibuku nayo idi na myanda palapala. Tukengidija ino myanda shi befundi ba Bible basaka kuyukila’ko bivule pa myanda kamukaya. Bipindi bya ino mbwejo bikabandaulwa mu Kifundwa kya Kitabo kya pa Kipwilo. Myanda yonso ya mu mbwejo ikatangwa na mutangi wa kifundwa, ino shi i bilampe, nabya mukatyiba’byo mu bipindi. Kekudipo bipangujo ku mbwejo. Penepa mutadi ukaloba tudi mu kanwa na kwipangula bipangujo bikokela milangwe pa myanda mikatampe.

⁴ Bifundwa bya dibuku Bifundija Bible bikenda lubilo mu Kifundwa kya Kitabo kya pa Kipwilo. Ino ketukatabulapo uno muswelo potwifunda dino dibuku na bakwetu, nakampata shi badi na buyuki butyetye bwa Bible nansha shi kebadipo nabo. (Bilongwa 26:28, 29) Mu bifundwa bya Bible bya ku njibo, tukesambila pa bisonekwa byonso ne pa mfulo, kushintulula byelekejo, ne bikwabokwabo. Nanshi witungile kitungo kya kutanwa’ko yenga ne yenga ne kulondolola ku kifundwa kya kitabo Lelo I Bika Bine Bifundija Bible?